Jetisaıda «Qys - 2019» komandalyq oqý-jattyǵýy ótti

JETІSAI. QazAqparat – Túrkistan oblysy Jetisaı aýdanynda qys mezgilinde bolatyn tótenshe jaǵdaılardyń aldyn alý maqsatynda «Qys-2019» komandalyq oqý-jattyǵýy ótti. Sharaǵa qatysqan aýdan ákimi Jamantaı Beısenbaev barlyq salalyq bólimderdiń daıyndyǵyn kórip, kez kelgen sátte tótenshe jaǵdaıǵa daıyn bolý kerektigin atap ótti, dep habarlaıdy QazAqparat tilshisi.

Oqý-jattyǵýda sala mamandary qys kezindegi tótenshe jaǵdaılardy joıý jónindegi is-áreketterin pysyqtap, kóshirý jáne ishki ister organdarymen ózara árekettesý josparyn naqtylady. Sondaı-aq, barlyq deńgeıdegi avarııalyq-qutqarý, dıspetcherlik jáne boljaý qyzmetteriniń jumysyn, jedel kezekshilik pen basqarýynyń uıymdastyrylýyn, habarlaý jáne baılanys júıesiniń daıyndyǵyn tekserdi. Qys kezindegi yqtımal tótenshe jaǵdaılardy joıý úshin qurylǵan avarııalyq-qutqarý qyzmetiniń qurylymy men qural-saımandarynyń esebi de anyqtaldy.

Jıyn barysynda energııa, gaz, jylý, aýyz sýmen qamtamasyz etý júıeleriniń jáne kólik qatynastarynyń jumys isteýge daıyndyǵy pysyqtaldy. Táýelsiz energııamen qamtamasyz etý kózderiniń, materıaldyq-tehnıkalyq, azyq-túlik, medıtsınalyq jáne basqa da qorlardyń shamasy belgili boldy. Oqý-jattyǵý barysynda avarııalyq-qutqarý qyzmeti jáne basqa da kezek kúttirmeıtin jumystardy júrgizýde shuǵyl basqarý algorıtmderi jasaldy.

Halyqty shuǵyl habarlandyrý úshin aýdandyq ortalyqtandyrylǵan habarlaý júıeleri, daýys kúsheıtkish quraldary, teledıdar jáne basqa da BAQ arqyly taratý tártibi qaraldy.