Jetisaıda qaraqshylyq shabýyl jasaǵan qylmystyq top ustaldy
JETІSAI. QazAqparat - Bıylǵy jyldyń qazan aıynyń sońynda Jetisaı APB-niń kezekshilik bólimine birden jergilikti úsh turǵyn qońyraý shalyp, páterlerinen qomaqty qarajattary men baǵaly áshekeı buıymdarynyń urlanǵandyǵyn aıtqan, dep habarlaıdy QazAqparat oblystyq ІІD baspasóz qyzmetine silteme jasap.
Polıtseıler osy atalǵan ispen aınalysyp jatqanda, aýdandaǵy maqta qabyldaý pýnkteriniń birine qaraqshylyq shabýyl jasalǵandyǵy týraly aryz túsedi. Belgili bolǵandaı, kúdiktiler páter ıeleriniń úılerinde joq ekendigin paıdalanyp, bir túnniń ishinde qatarynan birneshe úıge urlyqqa túsken. Al aýdandaǵy maqta qabyldaý pýnktteriniń birine saǵat túngi 3:30-dar shamasynda jasalǵan qaraqshylyq shabýyl kezinde kúzetshini uryp, soǵyp, baılap, kassırdi qorqytý arqyly ondaǵy seıften 1 mln 700-myńnan astam aqsha men kúzetshiniń qaltasyndaǵy 120 myń teńgesin jáne uıaly telefonyn alyp ketken.
Kóp uzatpaı polıtseıler qylmystyq top múshelerin óz kóligimen alyp júrgen kúdiktini qolǵa túsirdi. Qylmystyq top músheleri 5 adamnan quralǵan. Qazirgi tańda olardyń tórteýi qolǵa tústi. Ekeýi Almaty oblysynyń buryn qaraqshylyq boıynsha sotty bolǵan turǵyndary, al taǵy ekeýi Jetisaı aýdanynyń jergilikti turǵyndary. Besinshi kúdikti, Qazyǵurt aýdanynyń turǵyny búgingi tańda izdestirilýde.
Atalǵan qylmystyq top músheleriniń páter urlyǵynyń 10 jaıtyna qatysy bar ekendigi anyqtaldy. Jalpy shyǵyn kólemi 8 mıllıon teńgege jýyqtaıdy. Al ustalǵan qylmyskerlerden 700 myń teńge men úı ıesiniń birinen urlanǵan buıym tárkilendi. Sonymen qatar Jetisaı APB qyzmetkerleri olardyń taǵy da basqa osyǵan uqsas qylmystarǵa qatystylyǵy bolýy múmkin ekendigin joqqa shyǵarmaıdy.
Ustalǵan kúdiktiler qamaýda. Tergep tekserý amaldary jalǵasyp jatyr.
