Jetisaıda egistik alqabynda jappaı tóbeles boldy: 12 adam jaraqat alǵan
JETІSAI. QazAqparat - Túrkistan oblysynyń Jetisaı aýdanynda egistik basynda jappaı tóbeles bolyp, 12 adam jaraqat alǵan. Osy oqıǵaǵa qatysty eki adam qamaýǵa alyndy, dep habarlaıdy QazAqparat tilshisi.
Oblystyq PD baspasóz qyzmetiniń málimetinshe, jappaı tóbelestiń vıdeosy áleýmettik jelige taraǵan. Onda egistik basyndaǵy dıqandar bir-birin taıaqtap jatqany kórinedi. Oqıǵany teksergen jetisaılyq polıtseıler tóbelestiń 29 mamyr kúni bolǵanyn aıtady.
Egistik alqabyna shuǵyl shyqqan tártip saqshylary adamdar arasyndaǵy tóbeles egistikke jiberiletin sýǵa talastan paıda bolǵanyn anyqtaǵan. Tóbelesten keıin dárigerdiń kómegine 12 azamat júgingen. Olardyń beseýi Jetisaı aýdandyq aýrýhanasyna jatqyzylyp, ózgeleri alǵashqy medıtsınalyq kómekten keıin úılerine qaıtarylǵan.
«Atalǵan jaıt QR QK-tiń 293-babymen tirkeldi. Qazirgi tańda turǵyndardyń alǵan dene jaraqattarynyń aýyrlyǵyn anyqtaý maqsatynda sot-medıtsınalyq saraptama taǵaıyndaldy.Tártip saqshylary tekserý barysynda osy tóbeleske qatysqan 2 azamatty ustap, ýaqytsha ustaý ızolıatoryna qamaýǵa aldy. Qazirgi ýaqytta atalǵan jaıt boıynsha barlyq tulǵalardy jáne kinálilerdi anyqtaýǵa baǵyttalǵan tergeý amaldary júrgizilýde. Oqıǵanyń tolyq mán-jaıy tekserilýde» delingen habarlamada.
