Jetisaıda ashylǵan halyqtyq keńse el ıgiligine jarap jatyr – polıtsııa
JETІSAI. QazAqparat – Túrkistan oblysy Jetisaı aýdanynda ashylǵan halyqtyq keńse el ıgiligine jarap jatyr. Bul týraly halyq aldynda esep bergen aýdandyq polıtsııa bóliminiń bastyǵy Ermahan Ábdramanov málimdedi, dep habarlaıdy QazAqparat tilshisi.
Esep berý jıynyna QR UQK Túrkistan oblysy boıynsha departamenti Jetisaı aýdany bóliminiń bastyǵy Arman Qojabaev, Jetisaı aýdanynyń prokýrory Nurǵalı Asqanbekov pen aýdan ákiminiń mindetin ýaqytsha atqarýshy Asan Mahanbetov, aýdandyq «Nur Otan» partııasy fılıaly tóraǵasynyń birinshi orynbasary Ádilhan Asaýov pen bólim basshylary, mektep dırektorlary men aýyl ákimderi jáne aýyl bıleri qatysty.
Halyqpen kezdesýde polıtsııa bóliminiń bastyǵy, polıtsııa polkovnıgi aýdandaǵy qylmys pen quqyq buzýshylyqtyń aldyn alý baǵytynda atqarylǵan jumystardy baıandady. Onyń sózinshe, jalpy 565 qylmys tirkelip, qylmystyń ashylýy 89 paıyzdy quraǵan.
Taǵy bir aıta ketetin másele - aýdanda júrgizilgen jedel is-sharalardyń nátıjesinde 77 aýyr jáne asa aýyr qylmystyń 62-si ashylǵan. Bul - jalpy qylmystyń ashylýynyń 85,5 paıyzy. Al qasaqana densaýlyqqa aýyr zııan keltirý qylmysy 80 paıyzǵa kemigen.
«Qazirgi tańda óńirde ózekti máselelerdiń biri - mal urlyǵy bolyp tursa, bul baǵytta árbir ákimshilik aýmaqta profılaktıkalyq jumystar júrgizilip jatyr. Nátıjesinde Jetisaı óńirinde mal urlyǵy boıynsha byltyr da, bıyl da 22 dáıekten tirkelip, birqalypty bolyp otyr. Sondaı-aq, zańsyz oıyn bıznesiniń aldyn alý maqsatynda Jetisaı APB qyzmetkerleriniń arnaıy reıdtik jumystaryn júrgizý barysynda 7 oıyn-saýyq mekemeleri jumys atqarǵandyǵy anyqtaldy. Olarǵa qatysty Qylmystyq kodekstiń 307-baby boıynsha is qozǵalyp, protsessýaldyq sheshim qabyldaý úshin memkirister departamentine joldanǵan»,- dedi Ermahan Ábdramanov.
Aýdannyń bas polıtseıi sondaı-aq, únemdelgen qarajat esebinen aýdandyq polıtsııa bóliminiń janynan halyqtyq keńse qurylǵanyn aıtyp ótti. Qazirgi tańda atalǵan keńse mamandary 276 azamatty qabyldap, olarǵa quqyqtyq kómek kórsetken.
