Jetisaıda 74 adamnyń aqshasyn jymqyrǵan qarjy pıramıdasynyń joly kesildi
JETІSAI. QazAqparat - Jetisaıda qarjy pıramıdasynyń joly kesildi, dep habarlaıdy QazAqparat oblystyq polıtsııa departamentine silteme jasap.
Búgin brıfıngte Túrkistan oblysy polıtsııa departamentiniń bastyǵy, polıtsııa general-maıory Qaırat Dálbekov Jetisaıda polıtseıler qarjy pıramıdasynyń qyzmetin toqtatqanyn málimdedi.
Bul jaıt QR QK 217-baby 3-bóligi boıynsha tirkelgen.
«Tergeý barysynda keńsege tintý júrgizilip, qujattar, jabdyqtar, kompıýterler jáne basqa da aıǵaqty zattar tárkilendi. Polıtsııaǵa Jetisaı, Maqtaaral jáne Shardara aýdandarynan 74 turǵyny aryzdanǵan. Jábirlenýshiler sany áli de artýy múmkin. Shyǵyn kólemi anyqtalyp jatyr. Búgingi tańda Jetisaı aýdandyq polıtsııa bóliminiń bazasynda arnaıy jedel-tergeý toby quryldy», - dep atap ótti departament bastyǵy.
20 tamyzda Shymkent qalasynan polıtsııa bólimine pıramıda jasady degen kúdikpen Jetisaı aýdanynyń turǵyny JShS dırektory jetkizildi. Sondaı-aq onyń eki sybaılasy, Maqtaaral aýdanynyń turǵyndary ustaldy. Qazirgi ýaqytta osy qylmystyq is boıynsha sotqa deıingi tergeý júrip jatyr. Kúdiktiler qamaýda.
Óz kezeginde Túrkistan oblysynyń polıtseıleri azamattarǵa «jeńil aqsha» úshin kez kelgen beıtanys adamdarǵa senbeý qajettigin eskertedi.
