Jetisaıda 16 myńnan astam kópbalaly ana turady
Búginde Jetisaı aýdany boıynsha 16 498 kópbalaly ana bar. Onyń ishinde 369-y batyr ana bolsa, 1686-y «Altyn alqa» ıegerleri. Sondaı-aq óńirde 5 537 «Kúmis alqa» ıegeri, 746 І jáne ІІ dárejeli «Ana Dańqy» ordenimen marapattalǵandar turady.
Kópbalaly otbasylardyń biri – Jyly sý aýyldyq okrýginiń turǵyny Súttibaevtar áýleti. Bir ereksheligi – bul áýlettegi ul-qyzdardyń barlyǵy da kópbalaly.
Shańyraqtyń uıytqysy bolyp otyrǵan Záýre Seıdimbekqyzy 13 qursaq kóterse, kelinderi men qyzdary da batyr ana jolyn jalǵastyryp 7-8 perzentti ómirge alyp kelgen. Qazir aq jaýlyqty áje ul-qyzdarynan 75 nemere men 30 shóbere, 8 shópshek súıip otyr.
«Bizdiń kezde zaman azdap qıyndaý boldy. Ol kezdiń analaryna qazirgideı jaǵdaı jasalǵan joq. Perzentterimniń jartysyn ózim jaıaý baryp bosansam, ekeýin úıde bosandym. Jubaıym bir úıdiń jalǵyz balasy bolǵandyqtan bar oıym kúıeýimniń urpaǵyn kóbeıtý edi. Eshqandaı balamdy aldyn ala josparlamadym. Qudaıdyń bergen perzentin ómirge ákeldim. Osy kúnime shúkirshilik aıtamyn. Adam urpaǵymen myń jasaıdy. Alla osy urpaqtarymdy aman etsin», - deıdi Záýre Seıdimbekqyzy.
