Jetisaıda 100 jastaǵy ájeı ómirinde birinshi ret jeke kýálik aldy
JETІSAI. QazAqparat - Túrkistan oblysy polıtseıleri qujattaryn joǵaltyp alǵan qart turǵynnyń qujatyn qaıta jasap berdi, dep habarlaıdy QazAqparat oblystyq polıtsııa departamentine silteme jasap.
Aıta keteıik, bıylǵy aqpan aıynda Jetisaı aýdany Kúrishti aýylynyń turǵyny 99 jasqa kelgen Kúlaı Súgirbaevanyń osy kúnge deıin jeke kýálik almaǵany anyqtalǵan edi. Kúlaı áje óziniń barlyq qujattaryn joǵaltyp alǵan, sonyń saldarynan ul-qyzdary da qujatsyz júrgen.
Polıtseıler atalǵan qart turǵynnyń Jetisaı aýdany polıtsııa bólimine ótinish bildirmegenin jáne kóshi-qon qyzmetine júginbegenin aıtqan bolatyn.
Osyǵan baılanysty qujatsyz qart turǵynǵa tártip saqshylary Qazaqstan Respýblıkasy ІІM buıryǵyna sáıkes QR azamattyǵyna qujattandyrý úshin birinshi kezekte polıtsııa bólimine baryp ótinish jazýy tıis ekendigin túsindirgen. Oǵan qosa QR azamaty ekenin anyqtaý úshin ótinishhatpen birge týý týraly kýálik, eńbek kitapshasy, bilimi týraly attestat, dıplom nemese sharýashylyq boıynsha kitaptan úzindi kóshirmelerin tapsyrýy qajet.
Alaıda, tekserý barysynda ájeıde joǵaryda kórsetilgen qujattardyń eshqaısysy joq ekeni belgili boldy.
Osyǵan qaramastan Jetisaı APB kóshi-qon qyzmetkerleri QR ІІM talaptaryn egjeı-tegjeıli túsindire otyryp, turǵynǵa qujattaryn jınaqtaýǵa kómektesti. 2-3 aı aralyǵynda sot sheshimimen týý týraly kýáligi qalpyna keltirilip, daıyn boldy. Odan keıin jedel áreket etken polıtseıler K.Súgirbaevanyń QR azamattyǵyn rastaý týraly ótinishhatyn qabyldady. 20 kúnnen keıin turǵynnyń jeke kýáligi daıar boldy.
Osylaısha bir ǵasyr jasaǵan ájeıge jeke kýáligin áperý úshin tártip saqshylary barlyq qajetti sharalardy júrgizip, kómek qolyn sozdy. Daıyn qujatty aqjaýlyqty ananyń shańyraǵyna baryp, arnaıy tabystady.
Óz kezeginde jetisaılyq 100 jastaǵy ana qujattaryn jasap bergen polıtseılerge alǵysyn aıtyp, batasyn berdi.
