Jetisaı turǵyny bıjýterııany altyn dep aldap, 4 mln teńgege lombardqa ótkizgen

JETІSAI. QazAqparat - Túrkistan oblysynyń turǵyny altynǵa uqsas áshekeılerdi lombardqa 4 mln teńgege ótkizgen, dep habarlaıdy QazAqparat polıtsııaǵa silteme jasap.

Jetisaı aýdandyq polıtsııa bólimine lombardtan aryz tústi.

Shaǵymdanýshy er adamnyń aıtýynsha, senimge kirgen áıel altynǵa uqsas áshekeılerdi aldap ótkizip, jábirlenýshige 4 mln teńge shyǵyn keltirgen.

Atalǵan fakti QR QK 190-baby boıynsha tirkeýge alyndy. Jergilikti turǵyn anyqtaldy.

Belgili bolǵandaı, turaqty tutynýshy bolyp kúdikti áıel alǵashqy ýaqytta altynnyń ózin ótkizip, artynan áshekeı alqalardy da qosyp otyrǵan.

Al lombard qyzmetkerleri altyndardyń jasandy ekenin baıqamaı qalǵan. Osylaısha, jeńil kelgen aqshany bas paıdasyna jaratqan.

Qazir kúdikke ilingen áıelge qatysty tergeý amaldary júrgizilip jatyr.