Jetisaı men Maqtaralda sońǵy 30 jylda mundaı kólemde jaýyn jaýmaǵan - TJD
TÚRKІSTAN. QazAqparat - Túrkistan oblysynda tolassyz jaýǵan jańbyrmen kúres jalǵasyp jatyr, dep habarlaıdy QazAqparat tilshisi.
Túrkistan oblysyna qarasty Maqtaaral jáne Jetisaı aýdandarynda tolassyz jaýǵan jaýyn-shashyn áserinen kóshelerdi, aýla aýmaqtaryn sý basqan bolatyn.
Qazirgi tańda turǵyn úılerdiń sý basýyna jol bermeý maqsatynda TJD qyzmetkerleriniń kómegimen jańbyr sýyn sorý jumystary jalǵasyn tapty.
Bul týraly Túrkistan oblystyq TJD bastyǵynyń orynbasary Erik Sarybaev aıtyp ótti.
«Sońǵy 30 jyldan beri atalǵan aýdandarǵa mundaı kólemde jaýyn jaýmaǵan. Aýdan halqy egin sharýashylyǵymen aınalysatyn bolǵandyqtan egistik alqaptaryn sordan shaıý jumystaryn atqarý men jerasty sýlary mólsheriniń kóterilýi de jaýyn sýynyń jerge sińip ketýine kedergi keltirýde. Jaýyn-shashyn 20-naýryzǵa deıin tolassyz jaýýy yqtımal. Tabıǵattyń tosyn minez tanytýynan qulaǵan turǵyn úı deregi tirkelmedi»,- dedi Erik Temirhanuly.
Jedel áreket etý jumystaryna tótenshe jaǵdaı departamentiniń 124 mamany jumyldyrylǵan.
Qazirgi tańda 24 tehnıka men 55 motopompa kómegimen 169 aýla aýmaǵynan 19635 tekshe metr sý sorylǵan.
Aıta keteıik, osydan eki-úsh kún buryn tolassyz jaýǵan jańbyr Túrkistan oblysyndaǵy Jetisaı men Maqtaral aýdandarynyń turǵyndaryn ábigerge salǵan bolatyn.
Qazir qos aýdanda turǵyn úıler men aýlalardy jańbyr sýynan tazartý jumystary júrip jatyr.
