Jetisaı qalasynyń 50 jyldyq mereıtoıy atalyp ótti
JETІSAI. QazAqparat – Túrkistan oblysy Jetisaı qalasyna 50 jyl tolýyna oraı merekelik shara ótti. Bul kúni aýdan ortalyǵynda jyl qorytyndylanyp, aýylsharýashylyq ónimderiniń «Altyn kúz – 2019» jármeńkesi uıymdastyryldy, dep habarlaıdy QazAqparat tilshisi.
Aýdan ortalyǵy Jetisaı qalasynyń 50 jyldyq torqaly toıynda qala ákimdiginiń uıymdastyrýymen mádenı is-shara bolyp, qalanyń damýyna úles qosqan azamattar «Jetisaı qalasynyń 50 jyldyǵy» merekelik tós belgilerimen marapattaldy. Birqatar azamattarǵa arnaıy dıplomdar tabys etildi. Shara barysynda aýyl sharýashylyǵy ónimderiniń jármeńkesi men salalyq kórmeler, baýyrsaq pen palaý festıvalderi, kókónis pıramıdalary ornalastyryldy. Sondaı-aq, túrli sporttyq saıystar jáne aýdan ónerpazdarynyń qatysýymen keń kólemdegi kontserttik baǵdarlamalar uıymdastyryldy. «Altyn kúz – 2019» merekelik sharasynda jyl boıyna etken eńbektiń nátıjesinde úlken jetistikke jetken dıqan-sharýalar men túrli sala mamandary arnaıy nomınatsııalar boıynsha oblys, aýdan ákiminiń, aýdandyq máslıhat pen qala ákimdiginiń marapattaryna ıe boldy. Merekelik sharada qalanyń keshegisi men búgini aıtylyp, tarıh betterine esimderi altyn áriptermen jazylǵan azamattardyń eren eńbekteri aıtyldy.
Aıta keteıik, bıylǵy jyl tabıǵattyń qolaısyzdyǵyna qaramastan jetisaılyqtar úshin tabysty boldy. Egistik alqaptaryndaǵy ónim ysyrap bolmaı, der kezinde jınalyp alyndy. Aýdanǵa qarasty birqatar aýyldyq okrýgteri aq altyn jınaýda joǵary kórsetkishterge qol jetkizdi. Desek te, aýdanda kúzgi jıyn-terim jumystary áli de jalǵasýda. Jyl sanap kórkine kórik qosyp kele jatqan Jetisaı qalasy sońǵy jyldary adam tanymastaı ózgerdi. Úkimettiń shaǵyn qalalardy kórkeıtý, damytý tapsyrmasyna baılanysty qazir qalada kórkeıtý, kóriktendirý sharalary qyzý júrip jatyr. Qalada aıaq joldar salynyp, sýburqaqtar ornatyldy. Ákimshilik ǵımaratynyń aınalasy gúlzar orynǵa aınalǵan. Kósheler jaryqtanyp, avtojoldarǵa tas tóseldi.
Qalanyń kórkine kórik qosqan záýlim ǵımarattar boı kóterip, jyl basynan beri qalaǵa 1 mlrd 528 mln 357 myń teńge ınvestıtsııa tartylǵan.
