Jetisaı qalasynda ortalyq bazar órtendi
JETІSAI. QazAqparat – Túrkistan oblysy, Jetisaı qalasynda ortalyq bazardyń aýmaǵy órtendi. Jalyn «Kúlparshyn» bazarynyń aýmaǵyndaǵy azyq-túlik jáne kıim satatyn býtıkterdiń janynan shyqqan, dep habarlaıdy QazAqparat tilshisi.
Oblystyq TJD málimetinshe, Jetisaı №3 mamandandyrylǵan órt sóndirý bóliminiń «101» nómirine bazardyń aýmaǵy janyp jatqany týraly habarlama túsken. Órtti sóndirýge jeke quramnan 34 adam men 11 dana tehnıka jumyldyrylǵan. Tilsiz jaý 450 sharshy metr jerdi sharpyp, 290 sharshy metr aýmaq tolyq janyp ketkeni anyqtalǵan.
«Órtten qaza taýyp, jaraqat alǵandar joq. Órt sóndirý qyzmetkerlerimen janǵan býtıkterdiń janyndaǵy 2000 sharshy metr saýda qatary qutqaryldy. Qazirgi tańda, órttiń shyǵý sebebi anyqtalýda» delingen habarlamada.
