Jetisaı qalasynda aýyz sý problemasy sheshilýde
JETІSAI. QazAqparat – Túrkistan oblysy, Jetisaı qalasynyń ákimi Turyshbek Elshibaev BAQ ókilderine qalanyń turmys tirshiligi týraly aıtty, dep habarlaıdy QazAqparat tilshisi.
Qalada kópqabatty úıler boı kóterip, joldar jóndele bastaǵan. Búgingi kúni 1937 azamat jeke turǵyn úı qurylysy úshin jer ýchaskesine kezekke tursa, jyl basynan beri 23 turǵyn úı paıdalanýǵa berilgen. Jetisaıdyń ınjenerlik kommýnıkatsııalyq ınfraqurylymyn damytý maqsatynda da birshama jumystar júrgizilýde.
«Qalamyzdy jasyl jelekke aınaldyrýǵa, kórkeıtý-kógaldandyrýǵa erekshe kóńil bólinip keledi. Aǵymdaǵy jyly kóktem aılarynda 1 myńnan asa shyrsha kóshetteri otyrǵyzyldy. Bul jumystar óz jalǵasyn tabýda. Búgingi tańda qalada sáýletine sáýlet qosqan memorıal esketkishter men monýmentaldy stellalar boı kóterdi. Demalys oryndary men gúlzarlar, sýburqaqtar paıda boldy»,- deıdi qala ákimi Turyshbek Kúlishuly.
Ákim sondaı-aq, «Jumyspen qamtý 2020 jol kartasy» baǵdarlamasy sheńberinde 69 jas maman jastar praktıkasyna jiberilgenin atap ótti. Áleýmettik jumys oryny boıynsha 154 azamat jumyspen qamtylǵan, kóriktendirý, kórkeıtý, sanıtarlyq tazalyq jumystaryna jumyssyz retinde tirkeýde turǵan 61 azamat qoǵamdyq jumysqa tartylǵan. Qalada sonymen qatar aýyz sý máselesi de birtindep sheshimin taýyp keledi.
«Jaz mezgilinde qalamyzdyń keıbir jerlerinde aýyz sý tapshylyǵy baıqalady. Bul birinshiden tutynýshylar sanynyń kóbeıýinen jáne sýdy tutyný kólemi jyl saıyn ósýde. Ekinshiden, sý qubyrlarynyń negizinen tozyǵy jetken. Atalǵan máselerdi sheshý maqsatynda jergilikti bıýdjetten qarjy bólinip, qazirgi tańda 80 kóshege jobalaý-smetalyq qujattary rásimdelip saraptamaǵa joldanǵan. Sonymen qatar, qalamyzdyń 1-shi, 2-shi móltek aýdandaryn «Abaı» toptyq sý júıesine qosý josparlanýda, qosý úshin jumystar júrgizilýde»,- dedi shahar basshysy.
