Jetisaı aýdanynda turatyn muqtaj otbasy jylyjaımen aınalysatyn boldy
TÚRKІSTAN.QazAqparat – Túrkistan oblysy, Jetisaı aýdanynda turatyn muqtaj otbasy jylyjaı isimen aınalysatyn boldy. Samıra Farzalıeva buǵan deıin oblys ákiminiń orynbasary Meıirjan Myrzalıevtiń qabyldaýynda bolyp, jergilikti bılik tarapynan áleýmettik kómek berýin ótingen edi, dep habarlaıdy QazAqparat tilshisi.
Aýyl turǵyny sondaı-aq bılik ókilinen múgedektigin ІІІ toptan ІІ topqa ótkizýge qolushyn sozyp, kómektesýin suraǵan. Atalmysh azamatshanyń ótinishine oraı jaı-kúıimen tanysý maqsatynda aýdan ákimi Jamantaı Beısenbaev Abaı aýyldyq okrýginiń «Halyqtar dostyǵy» eldi mekeninde boldy. Jarymjan jannyń otbasymen tanysty. Ulynyń turaqty jumysy joqtyǵyn jáne kelini bala tárbıesimen úıde otyrǵanyn kórdi. Múmkindigi shekteýli ana aýdan basshysynan áleýmettik kómek pen ulynyń kásip ashýyna, qys aýasynda otyn-kómirden kómek kórsetýin ótindi. Oǵan aýdan basshysy ulynyń qysqa merzimdi oqytý kýrsyna qatysyp, kásipkerlik salasynyń qyr-syryn oqyp-bilýine kómektesetinin jetkizdi.
«Ulyńyzdyń bıznes-josparyn jasap, 530 myń teńge memlekettik qaıtarymsyz grant alýyna jáne sizdiń múgedektigińiz týraly qujattardy qaıta qaraýǵa kómektesemiz. Tıisti qarajatty alǵan soń, úıirgelik jerlerińizdi tıimdi paıdalanyp, jylyjaı salyńyzdar. Júzim ósirińizder. Al, otyn-kómirlerińizdi múmkindiginshe túsirip beremiz»,- dedi Jamantaı Beısenbaev.
Aýdan ákimi múgedek áıel turatyn Abaı aýyldyq okrýginiń ákimi Qanat Tileýovke tıisti máseleler boıynsha naqty jumystar atqarýdy tapsyrdy. Bazynasyn aıtyp, kómek suraǵan Samıranyń ulyna 530 myń teńge qaıtarymyz memlekettik grant alýdyń joldary men talap-erejeler túsindirildi. Aldaǵy ýaqytta úıirgelik 5 sotyq jerine jylyjaı salyp, turmysyn túzetýine tıisti kómek kórsetiletin boldy.
