Jetisaı aýdanynda shyǵarylatyn aıaq kıimder arzan baǵada satylýda
JETІSAI. QazAqparat – Túrkistan oblysy, Jetisaı aýdanynda sporttyq aıaq kıim shyǵaratyn shaǵyn tseh jumys isteıdi. Sh.Dildábekov aýyldyq okrýginen ashylǵan kásiporynnyń jumysymen aýdan ákimi Jamantaı Beısenbaev tanysyp qaıtty, dep habarlaıdy QazAqparat tilshisi.
Táýligine 1500 jup aıaq kıim shyǵaratyn kásiporynda 25 adam turaqty jumyspen qamtylǵan. Jeke kásipker Sáken Shoraev basqaratyn tsehta negizinen sporttyq aıaq kıimder tigilip, jergilikti bazarlar men kórshiles aýdan turǵyndarynyń suranysyn qanaǵattyndyryp otyr. Bul aıaq-kıimderdiń baǵasy 1900 – 2000 teńgeniń kóleminde. Negizgi shıkizatty Qytaıdan aldyratyn kásipker aýdan ákimine óz josparlaryn aıtyp, aldaǵy ýaqytta kásibiniń aýqymyn keńeıtýdi kózdep otyrǵanyn jetkizdi. «Ózimizdiń otandyq ónimderimizdi bolashaqta brendke aınaldyrsaq, shaǵyn kásipornymyzdyń aýqymyn keńeıtsek degen jospar bar. Sondaı-aq aıaqkıimderdiń sanyn eki esege arttyrý oıda bar. Josparlarymyz júzege asyp jatsa, taǵy da qosymsha jumysshylardy qabyldaıtyn bolamyz. Osylaısha jergilikti halyqtyń turmysyn jaǵdaıyn jaqsartýǵa úles qosqymyz keledi. Bolashaqta Jetisaıdan shyqqan sporttyq aıaq-kıimderdi alys-jaqyn shetelderge eksporttasaq»,- deıdi kásipker. Eki jyldan beri toqtaýsyz jumys istep kele jatqan atalmysh kásiporyn básekelestikke tótep berýge qaýqarly sanalady. Sebebi, sapasy joǵary ári baǵasy tómen taýar qashanda halyqtyń suranysyna ıe. Óz kezeginde aýdan basshysy shaǵyn kásiporynnyń jumysyna oń baǵasyn berip, aldaǵy ýaqytta kásibin bastaǵysy keletinderge memleket tarapynan qoldaýlar kórsetiletinin jetkizdi.
