Jetisaı aýdanynda mal baǵýǵa ketken 8 jasar bala úıine qaıta oralmaǵan
JETІSAI. QazAqparat – Túrkistan oblysy, Jetisaı aýdanynda mal baǵýǵa ketken 8 jasar bala úıine qaıta oralmaǵan. Ózdiginen uldaryn taba almaǵan ata-anasy polıtsııaǵa aryzdanǵan, dep habarlaıdy QazAqparat tilshisi.
Oblystyq PD baspasóz qyzmetiniń málimetinshe, ol kúndizgi saǵat 16:30 shamasynda úıinen shyǵyp ketken. Balany tabý úshin Jetisaı aýdanynyń polıtseıleri men ákimshilik qyzmetkerleri jáne eriktiler birlesip, jedel-izdestirý sharalaryn júrgizgen. Olar aýyl ishin, kóshe-kósheniń árbirin muqııat qarap shyqqan. Іzdestirý jumystary jaıylymdyq jerler men egistik alqaptarynda,aryq-kanaldar da júrgizildi. Sonyń nátıjesinde ýchaskelik polıtsııa ınspektory Saparhan Kaıpov pen balanyń ákesi iz-tússiz joǵalǵan balany tańerteńgi saǵat 08:30 shamasynda aýyl janynan, egistikten tapqan.
«Tekserý barysynda bala maldaryn tappaǵandyqtan, úıine qaıtýǵa qoryqqanyn aıtqan. Sóıtip, óziniń úıiniń janyndaǵy otyn arasynda uıyqtap qalǵan. Al tań ata salysymen qaıtadan maldaryn izdep shyqqany belgili boldy. Qazirgi tańda balany qaraýsyz jibergen ata-anasyn ákimshilik jaýapkershilikke tartý máselesi qarastyrylýda» delingen habarlamada.
