Jetisaı aýdanynda kópbalaly analar áýleti daýys berdi

JETІSAI. QazAqparat - Túrkistan oblysynyń Jetisaı aýdanynda kópbalaly analar áýleti daýys berdi. Jyly sý aýyldyq okrýginde turatyn áýlettiń aq jaýlyqty anasy Záýre Seıdimbekqyzy kelin-qyzdarymen kelip, óz tańdaýlaryn jasady, dep habarlaıdy QazAqparat tilshisi.

Záýre Seıdimbekqyzy Súttibaevtar áýletiniń qazynasy, 75 nemere men 30-ǵa tarta shóbereniń, 8 shópshektiń ájesi. 14 jasynda osy áýletke kelin bolyp túsken apamyz 13 perzentti ómirge ákelgen. Qazir zeınetker ájeıdiń qyzdary da, kelinderi de kópbalaly ana. Ár otbasynda 6-7 perzentten bar.

«Bizdiń kezde zaman qıyndaý boldy. Ol kezdiń analaryna qazirgideı jaǵdaı jasalǵan joq. Perzentterimniń jartysyn ózim jaıaý baryp bosansam, bir-ekeýin úıde bosandym. Jubaıym bir úıdiń jalǵyz balasy boldy. Bar oıym kúıeýimniń urpaǵyn kóbeıtý edi. Eshqandaı balamdy aldyn-ala josparlamadym. Qudaıdyń bergen perzentin ómirge ákeldim. Osy kúnime shúkir táýba deımin. Búgin osy urpaǵymnyń jarqyn bolashaǵy úshin kelinderimdi, qyzdarymdy ertip kelip tańdaýymyzdy jasadyq»,- deıdi batyr ana.

Aıta keteıik, Jetisaı aýdany boıynsha 16 498 kóp balaly analar bolsa, onyń ishinde batyr analardyń sany - 369. Al, 1686-sy «Altyn alqa», 5537 -si «Kúmis alqa» alǵan.