Jetisaı aýdanynda «Halyqtyq keńse» ashyldy
Sybaılas jemqorlyqtyń aldyn alý maqsatynda ashylǵan ortalyqta bir mezgilde azamattardy qabyldaý, quqyqtyq keńes berý, qoljetimdi ári sapaly qyzmet kórsetý jumystary qarastyrylǵan, dep habarlaıdy QazAqparat tilshisi.
Ortalyqtyń saltanatty ashylý rásimine Sybaılas jemqorlyqqa qarsy is-qımyl agenttiginiń Túrkistan oblysy boıynsha departamenti basshysynyń birinshi orynbasary Mıras Qarǵabaı men aýdan ákiminiń orynbasary Asan Mahanbetov, aýdan prokýrorynyń orynbasary Maqsat Eralıev qatysty.
Aýdandaǵy mekeme jáne bólim basshylarymen kezdesý ótkizgen departament tóraǵasynyń birinshi orynbasary eldegi sybaılas jemqorlyqqa qarsy atqarylyp jatqan jumystar men nátıjeleri jaıynda aıtyp ótti. Zańdarǵa engizilgen ózgerister men tolyqtyrýlarǵa toqtaldy. Sybaılas jemqorlyq táýekelderin taldap, saldaryn saralady. Atqarylǵan jumystardyń barysyn arnaıy daıyndalǵan slaıdtarmen túsindirdi.
«Búgingi kúni Agenttiktiń bastamasymen el aýmaǵynda memlekettik organdardyń jumysy «Open space» formatyna kóshirilýde. Bul halyqqa barynsha qolaıly jaǵdaı týǵyzyp, ashyqtyq pen jarııalylyqty, sondaı-aq, jumys sapasynyń artýy men tutynýshylardyń kedergisiz qyzmet alý múmkindikterin qalyptastyrýda. Búgingi ashylǵan ortalyq jetisaılyqtarǵa tıimdi qyzmet kórsetip qana qoımaı, sybaılas jemqorlyq faktilerin azaıtýǵa yqpal etetin bolady», dedi Mıras Qarǵabaı.
Jańa keńsede azamattardyń óz-ózine qyzmet kórsetý buryshy da bar. Memlekettik qyzmetke júgingen kez-kelgen turǵyn sol jerde kórsetilgen qyzmet túrine avtomatty túrde baǵa da bere alady. Qandaı da bir qujat úshin ár bólimniń esigin qaǵyp, ýaqytyn joǵaltatyn turǵyndar endigi kezekte áýre-sarsańǵa salynbaı, sharýasyn bir ǵana ortalyqtan bitirip ketýine múmkindik jasalǵan. Bul óz kezeginde memlekettik qyzmetke degen halyqtyń senimin arttyryp, sapasyn jaqsartýǵa úlken septigin tıgizbek.