Jetisaı aýdanynda ǵasyr jasaǵan qarııaǵa qurmet kórsetildi
JETІSAI. QazAqparat –Túrkistan oblysynyń Jetisaı aýdanynda Qaroı aýylynyń turǵyndary ǵasyr jasaǵan qarııaǵa qurmet kórsetip, at pen avtokólik mingizdi. Al, aýyl okrýginiń ákimi Nurlybek Baqtııarov ǵasyr kýágeriniń keýdesine «Sanaly urpaqqa ónegeli tárbıe berý jolynda etken eńbegi úshin» tósbelgisin taqty, dep habarlaıdy QazAqparat tilshisi.
Aıta keteıik, júz jasaǵan aqsaqal Nalshe Bekshoraev 1921 jyly Ózbekstannyń Jızzaq oblysy, Farısh aýdanynda dúnıege kelgen. Ata-anasynan jastaı jetim qalǵan ol eńbekke erte aralasqan. Balalyq shaǵy asharshylyq náýbetine týra kelgendikten, mektepte oqyp saýat ashýǵa múmkindigi bolmaǵan. Óz zamanynyń qıynshylyqtaryna baılanysty kún-tún demeı jumys istegen. Ekinshi dúnıejúzilik soǵys jyldarynda tylda eńbek etip, aýdan ortalyǵynan shalǵaı jatqan qumdy aýyldarda túıekesh bolypty. Soǵys jyldarynan keıin kolhoz jáne sovhozdarda dıhanshylyqpen, mal jáne sý sharýashylyǵymen aınalysqan.
Jubaıy Ólmes Bekshoraeva ekeýi otandasqan 63 jyl ǵumyrlarynda 8 qyz, 3 ul tárbıelep ósirgen. Búginde olardan 43 nemere men 42 shóbere súıip otyr.
Aýyldas aǵaıyndary osyndaı el aǵasynyń ıyǵyna shapan shaýyp, syı-qurmetterin kórsetti. Náýbet jyldaryndaǵy qıyn taǵdyryn eske alǵan qarııa kózine jas alyp, qazirgi jastardy bardy qadirleýge jáne aıanbaı eńbek etýge shaqyrdy. Óskeleń urpaq pen jerlesterine aq batasyn berdi.
