Jetisaı aýdanynda eki aýyldyń turǵyndary kógildir otynǵa qol jetkizdi

TÚRKІSTAN.QazAqparat – Túrkistan oblysy Jetisaı aýdanynda eki aýyldyń turǵyndary kógildir otynǵa qol jetkizdi. Aýdandyq turǵyn úı, kommýnaldyq sharýashylyq bólimi qyzmetkerleri aldaǵy ýaqytta Kóktóbe aýylyna da gaz berý jumystary júrgizilip jatqanyn aıtady, dep habarlaıdy QazAqparat tilshisi.

40-qa tarta tútini bar Aǵynsaı jáne 250-ge tarta otbasy bar Útirtóbe aýylynyń turńyndary endi turaqty túrde tabıǵı gazdy tutynatyn boldy.

«Búgin mine, kópten kútken gazymyz kelip, máre-sáre bolyp, qýanyp jatyrmyz. Bizdiń aýylymyzǵa gaz tartýǵa tikeleı jumys istegen aýdan basshysyna, aýdandaǵy turǵyn úı, kommýnaldyq sharýashylyq bóliminiń jigitterine aıtar alǵysymyz sheksiz»,- deıdi Aǵynsaı aýylynyń turǵyny Ótepbergen Maqulbekov.

Atalǵan aýyldardyń turǵyndary kóp jyldan beri aǵash jarý, kómir tasý, kúl shyǵarý syndy qara jumystardan sharshaǵanyn aıtady. Ásirese aýyldyń kelinderi ys pen kúıeden qoldary bosap, jeńildep qalatyndyqtaryn jetkizdi.
«Meniń osy aýylǵa kelin bolyp túskenime 15 jyldyń júzi boldy. Alǵashqy kúnderden bastap kómir tasyp, ot jaǵyp kelemin. Endi, mine, gaz kelip, qolymyzdy jyly sýǵa malyp otyrmyz»,- deıdi Útirtóbe aýylynyń turǵyny Janar Begmanova.