Jetisaı aýdanynda buryn sotty bolǵan turǵynnyń úıinen esirtki tabyldy
MAQTAARAL. QazAqparat - Túrkistan oblysy Jetisaı aýdanynda buryn sotty bolǵan turǵynnyń úıinen opıı esirtkisi tabyldy. Polıtseıler qolǵa túsirgen kúdikti destrýktıvtik dinı aǵymnyń ustanýshysy retinde tirkeýde turǵan, dep habarlaıdy QazAqparat tilshisi.
TO Polıtsııa departamenti baspasóz qyzmetiniń málimetinshe, sezikti Jetisaı aýdandyq polıtsııa bólimi qyzmetkerleri júrgizgen ekstremızm men terrorızmge qarsy jedel is-sharalary barysynda qolǵa túsken. Onyń esirtki jáne psıhotroptyq zattardy ótkizý, zańsyz saqtaý is-áreketterin júzege asyrǵan jaıty anyqtaldy. Bul is boıynsha tártip saqshylary tergeý amaldaryn júrgizip, QR Qylmystyq kodeksiniń 296-baby «Esirtki, psıhotroptyq zattarmen, sol tektestermen, prekýrsorlarmen ótkizý maqsatynsyz zańsyz jumys isteý» boıynsha sotqa deıingi tergep tekserý tizilimine tirkeýge aldy. Kúdiktiniń turǵylyqty meken-jaıy tolyq tekserilip, nátıjesinde 60 gramǵa jýyq esirtki tektes zat tárkilendi. Ustalǵan kúdikti óziniń zańsyz is-áreketine qaramastan, polıtsııa qyzmetkerlerine qarsy kúsh qoldanbaq bolǵan.
«Qazirgi tańda quryqtalǵan azamatqa baılanysty tergep-tekserý amaldary jalǵasýda. Іske qatysty barlyq qujattar jınaqtalyp, sheshim shyǵarylý úshin sotqa joldanatyn bolady» delingen habarlamada.
