Jetisaı aýdanynda aýyl qarııalary qurmetke bólendi

JETІSAI. QazAqparat – Túrkistan oblysy Jetisaı aýdanynda 1 qazan - halyqaralyq qarttar merekesi qarsańynda merekelik shara ótti. Jańa aýyl aýyldyq okrýginiń turǵyndary men aýyl ákimi Nurlybek Bahtııarov qarııalarǵa arnap dastarhan jaıyp, syı-qurmet kórsetti, dep habarlaıdy QazAqparat tilshisi.

Shara aıasynda as berilip, quran baǵyshtaldy. Eldiń yntymaǵy men birligin saqtaýda aıanbaı eńbek etip júrgen el aǵalaryna Jańa aýyl aýyldyq okrýgi ákiminiń alǵys haty tabystaldy. Saltanatty shara barysynda aýyl aqsaqaldary Myrzashól dalasynyń ótkeni men búginin, táýelsiz Qazaqstan eliniń qol jetkizgen jetistikterin aıtyp, osynaý beıbit zamannyń negizin qalaǵan azamattarǵa alǵys aıtty.

Sonymen qatar, merekelik dastarhan basynda aǵa býyn ókilderi óskeleń urpaqqa jaqsy menen jamannyń arajigin ajyratatyn ósıeti men aqyl-keńesin aıtyp ótti. Eldegi ultaralyq tatýlyq pen saıası turaqtylyqtyń saqtalýyn, qaıǵysyz kúnniń túgesilmeýin tiledi.

«Búgingi jas – erteńgi eldiń senim artqan bolashaǵy. Biz jastarymyzǵa qandaı ónege kórsetip, qandaı tárbıe bersek elimizdiń bolashaǵy solaı qalyptasady. Sondyqtan, urpaq tárbıesinde «seniki, meniki» degen túsinik bolmaýy kerek. Ol – barshamyzǵa ortaq mindet»,- deıdi qazynaly qarttar.

Jastyq jigeri men kúsh-qaıratyn eliniń erteńine arnap, aıanbaı eńbek etken qarttarymyzdyń tól merekesin joǵary deńgeıde atap ótýde Jetisaı aýdandyq jáne Jańa aýyl aýyldyq okrýgi mádenıet úıi ónerpazdary da úles qosyp, kúmbirlete kúı tógip, ásem ánnen shashý shashty.