Jetisaı aýdanynda 800-den astam adam memlekettik grant alyp, kásip ashqan
TÚRKІSTAN. QazAqparat - Túrkistan oblysynyń Jetisaı aýdanynda bıyl 843 azamat jańa bıznes-ıdeıalardy iske asyrýǵa arnalǵan memlekettik grant alǵan, dep habarlaıdy QazAqparat Túrkistan oblysynyń Óńirlik kommýnıkatsııalar qyzmetine silteme jasap.
Qaıtarymsyz qarajatqa qol jetkizgenderdiń ishinde 86 adam «Bastaý bıznes» jobasy aıasynda mamandardan kásipkerlik negizderi boıynsha dáris alǵan.
Sonymen qatar, «Eńbek» memlekettik baǵdarlamasynyń birinshi baǵyty qysqa merzimdi kásiptik oqýdy aıaqtaǵandar sany - 536, ataýly áleýmettik kómek alýshylar - 219 adamdy quraıdy. Memlekettik grantty tıimdi paıdalaný úshin 43 adam jabdyqtar satyp alýǵa, 131 adam tehnıkalyq qural-jabdyqtardy alýǵa, 669 adam mal jáne qus sharýashylyǵyn damytýǵa qarjy alǵan.
Qysqa merzimdi kásiptik oqýdy aıaqtaǵandardyń biri Jetisaı qalasynyń turǵyny Jazıra Artyqova.
Jeke kásipker avtokólikterdiń oryndyǵyn qaptaýǵa tigin mashınasyn satyp alý úshin 555 600 teńge kóleminde memlekettik grant alǵan. Búginde ol óz isin órkendetý baǵytynda eńbek etýde.
