Jetisaı aýdanynda 4308 otbasyǵa qarjylaı kómek taǵaıyndaldy

TÚRKІSTAN. QazAqparat - Túrkistan oblysy Jetisaı aýdanynda 4308 otbasyǵa qarjylaı kómek taǵaıyndaldy. Bul týraly aýdan ákimdiginiń «Halyqty jumyspen qamtý ortalyǵy» KMM dırektorynyń mindetin ýaqytsha atqarýshy Medet Qasymov málim etti, dep habarlaıdy QazAqparat tilshisi.

Medet Qasymovtyń aıtýynsha, aýdanda kópbalaly analardan qujattar qabyldaý jumystary áli de jalǵasýda. ıAǵnı, bul kórsetkish aldaǵy ýaqytta da ósetin bolady. Máselen, alǵashqylardyń biri bolyp ataýly áleýmettik kómek alǵan jeti balanyń anasy Muńaıma Sydyqova 453 myń teńgeniń aýdarylǵanyn aıtady.

«Ózim mektep-ınternatta psıholog bolyp eńbek etemin, kúıeýim jumyssyz. Qujat tapsyrý jumystary 3-4 kúnge ǵana sozyldy. Barlyǵy durys bolǵandyqtan ákimdikke nebári eki ret qana bardym. Jeti perzentimniń úlkeni joǵary oqý orynynda aqyly negizde bilim alady. Keshe qarjymyzdyń aýdarylǵany jóninde habardy estip, qýanyp otyrmyz. Kópbalaly analarǵa qoldaý bildirip, kómek berip otyrǵan Elbasymyzǵa, úkimetke alǵysym sheksiz»,- deıdi Muńaıma Sydyqova.

Dál osyndaı qarjylaı kómekke 4 balanyń anasy Janar Baıtemirova da qol jetkizip otyr. Ol búginde Jetisaı qalasyndaǵy D. Qonaev atyndaǵy jalpy orta mektebinde ustazdyq etedi. Kúıeýi jumyssyz, uldarynyń úlken 10-shy synyp oqıdy. Jumysqa jaqyn jerden aıyna 25 myń teńgege páter jaldap turatyn januıa memleket tarapynan kórsetilip jatqan qarjylaı qoldaýǵa rızashylyqtaryn bildirdi.

«Qujatqa burynnan uqypty edim, tapsyrý barysynda kedergi bolǵan joq. Qala ákimdigine 2-3 ret baryp, qajetti qaǵazdarymdy ótkizdim. Mine, nátıjesinde bir aptaǵa jeter-jetpes ýaqytta qarjynyń aýdarylǵany jóninde habar estip otyrmyn. Atalǵan kómekti josparlap, júıelep jumsap, ıgiligimizge jaratamyz degen oıdamyz. Ár úsh aı saıyn berilgeni de qarjyny jınaýǵa óz septigin tıgizeri sózsiz», - deıdi Janar Baıtemirova.