Jetisaı aýdanynda 400 myń tonnadan astam baqsha ónimderi jınaldy
TÚRKІSTAN. QazAqparat - Túrkisstan oblysynyń Jetisaı aýdanynda «Altyn kúz-2018» is-sharasy toılanyp, Jetisaı qalasynyń kúni merekesi atalyp ótildi, dep habarlaıdy QazAqparat oblys ákiminiń baspasóz qyzmetine silteme jasap.
Sharaǵa oblys ákimi Janseıit Túımebaev qatysyp, jemister pıramıdasyn tamashalap, sút, nan ónimderi jáne aýyldyq okrýgterdiń aýyl sharýashylyq ónimderiniń kórmesin aralap kórdi.
«Altyn kúz - 2018» merekesi barysynda «Buqa», «Láńgi», «Aıyr aǵashpen dáldeý», «Kóńildi start» syndy sporttyq saıystar uıymdastyrylyp, qonaqtar baýyrsaqtan jasalǵan pıramıdadan dám tatty.
«Jetisaılyqtardyń bıylǵy toıy jyldaǵydan erekshe. Túrkistan oblysy, onyń ishinde Jetisaı aýdany negizinen aýylsharýashylyq baǵytyndaǵy salalardyń barlyǵyn qatar alyp kele jatqan, sonyń arqasynda damyp, tirshiliginiń berekesin keltirip otyrǵan aımaq. Sondyqtan agrarlyq sektordaǵy jetistikterimizdi barsha oblys eńbekkerleriniń ortaq jeńisi dep baǵalaımyz. Aýdannyń tabıǵaty baqsha ónimderin damytýǵa óte qolaıly. Jalpy bıyl Jetisaı aýdanynda 839 gektarǵa qyryqqabat egilse, odan 30 701,2 tonna ónim alynǵan. Onyń 80 paıyzy shetelge eksporttalǵan», - dedi Janseıit Túımebaev.
Jetisaı aýdanynda aýyl sharýashylyǵy daqyldarynyń jalpy egis kólemi 78 myń gektardy quraıdy. Sonyń bıyl 48 262 gektaryna maqta dáni sebilse, aýdan taýar óndirýshileri osy jyly maqtanyń ár gektarynan 25,2 tsentnerden ónim jınap, oblysta eń joǵary kórsetkishterdiń birine qol jetkizdi.
Aýdanda osy jyly 15 019,2 gektarǵa baqsha ónimderi otyrǵyzylǵan. Al, odan alynǵan ónimniń jalpy kólemi 426 159 tonnaǵa jetti. Máselen, 8 621,7 gektarǵa qaýyn, 6 397 gektarǵa qarbyz egilse, onyń 30 paıyzy shetelge eksporttaldy.
