Jetisaı aýdanyna issaparmen barǵan túrkistandyq koronavırýs juqtyrǵan
TÚRKІSTAN. QazAqparat – Túrkistan qalasynyń turǵyny Jetisaı aýdanyna issaparmen baryp kelgen soń, koronavırýs juqtyrǵany anyqtalǵan. Bul týraly oblys ákimdiginiń baspasóz qyzmeti málimet taratty, dep habarlaıdy QazAqparat tilshisi.
Ákimdiktiń dereginshe, 30 jastaǵy azamat 10 sáýir kúni Jetisaı aýdanyna jumys babymen barǵan.
«11 sáýir kúni tańerteń ol Túrkistanǵa qaıta oralǵan. Janynda tek júrgizýshi bolǵan. Qalaǵa kireberiste ekeýiniń de densaýlyq kórsetkishteri normaǵa saı bolyp, tirkeýge alynǵan. Artynsha dene qyzýy kóterilip, dárigerler kómegine júgingen. Naýqastan erterekte alynǵan analız búginde koronavırýs indetin juqtyrǵanyn rastady. Ol Kentaý qalalyq aýrýhanasynda oqshaýlanyp, tıisti em alýda. Densaýlyq kórsetkishteri birqalypty. Birge turatyn eki turǵyn men júrgizýshiden analız alynyp, olar da oqshaýlandy. Bul kisilermen baılanysta bolǵan basqa da azamattar anyqtalyp, tekserý jumystary atqarylýda. Turǵyn úı aýmaǵy jáne baılanysta bolǵan adamdar bolǵan jerlerde kúsheıtilgen zalalsyzdandyrý jumystary atqarylyp, oqshaýlandy», delingen habarlamada.
Sońǵy málimetter boıynsha aımaqta qaýipti ınfektsııany juqtyrǵan azamattar sany 56-ǵa jetti. Barlyq naýqastardyń jaǵdaıy qanaǵattanarlyq, shaǵym joq. Atalǵan azamattarmen baılanysta bolǵandardy anyqtap, oqshaýlaý jumystary júrgizilýde.
Foto: rbc.ru