«Jetinshi» arna qazaqstandyq telearnalardyń úzdik úshtigine kirýdi josparlap otyr
ASTANA. Qyrkúıektiń 15-i. QazAqparat /Gúlnár Jandaǵulova/ - Seısenbi kúni «Jetinshi arnanyń» basshylary buqaralyq aqparat quraldarynyń ókilderine jańa arnany tanystyrdy. Qyrkúıektiń 9-ynda qazaqstandyq teleefırde «Era» telearnasynyń ornyna «Jetinshi» degen ataýmen jańa arna paıda bolǵanyn esterińizge salamyz.
«Jetinshi» arnada 20.00-de orys tilinde shyǵatyn jáne 22.30-da qazaq tilinde shyǵatyn basty jańalyqtar shyǵarylymynan basqa - ár eki saǵat saıyn efırge jańalyqtardyń qysqa shyǵarylymdary berilip turatyn bolady.
«Qazir jańalyqtardyń aqparattar qyzmetinde 120 adam jumys isteıdi. Sonymen qatar, TMD qalalarynda jáne alys shet elderde jumys isteıtin tilshiler de bar», - dedi arnanyń bas dırektory Mıhaıl Dorofeev.
Jańa arnanyń bazasynda úsh stýdııa jumys isteıdi, alańy 500 sharshy metr bolatyn úlken túsirý pavılony salynýda. «Úsh jyl ishinde qazaqstandyq telearnalardyń úzdik úshtigine kirýdi josparlap otyrmyz. «Jetinshi» arna - bul tolyqtaı oqshaýlandyrylǵan ónim», - dedi M.Dorofeev.
«Jetinshi» arnany elimizdiń 18 qalasy - Astana, Almaty, Aqtaý, Aqtóbe, Atyraý, Jezqazǵan, Qaraǵandy, Kókshetaý, Qostanaı, Qyzylorda, Pavlodar, Petropavl, Semeı, Taldyqorǵan, Taraz, Oral, Óskemen jáne Shymkent qalalary kóre alady.
