Jetimderdi baspanamen qamtý eń aldymen ákimderdiń ustanymyna baılanysty -N. Nyǵmatýlın
ASTANA. 17 sáýir. QazAqparat - Jetimderdi baspanamen qamtý eń aldymen ákimderdiń ustanymyna baılanysty másele.
Búgin Parlament Májilisinde «Qazaqstan Respýblıkasynyń keıbir zańnamalyq aktilerine jetim balalar men ata-anasynyń qamqorlyǵynsyz qalǵan balalardyń turǵyn úıge quqyqtaryn qamtamasyz etý máseleleri boıynsha ózgerister men tolyqtyrýlar engizý týraly» zań jobasyn talqylaý barysynda palata tóraǵasy Nurlan Nyǵmatýlın osylaı málimdedi.
«Jetim balalar men ata-ana qamqorlyǵynsyz qalǵan balalardy baspanamen qamtý eń aldymen jergilikti ákimderdiń pozıtsııasyna baılanysty. Eger ákim túsinse onda baspana máselesin sheshýge bolady, al túsinigi bolmasa, onda ondaı sanatqa baspana bermeý úshin myńdaǵan sebep tabýǵa da bolady. Degenmen, búgingi birinshi oqylymda zań jobasynda kóptegen máseleler qamtyldy. Shyndyǵynda, kóptegen balalar Úkimetten naqty qadamdar kútýde. Men de zań jobasyn tolyq qoldaımyn», - dedi spıker.
Sonymen qatar, qujatty ekinshi oqylymǵa ázirleýge salmaqty qarap, tyńǵylyqty jumys atqarý qajettigin aıtqan palata tóraǵasy, qarastyrylatyn dúnıelerdiń bári tek jaqsy nıet túrinde qalyp qalmaýy kerektigin eskertti.
«Biz búgin tek bosaǵan páterlerdi berýdi qarastyryp jatyrmyz. Jańadan salynǵan bir de bir úı joq. Elimizde baǵdarlamalar da barshylyq. Endeshe, óńirlerde jetimder men ata-ana qamqorlyǵynsyz qalǵan balalardy baspanamen qamtýǵa arnalǵan baǵdarlamalar jasalsa ıgi», - dedi N. Nyǵmatýlın.
