Jetimderdi asyrap alǵysy keletin qazaqstandyqtardyń sany artyp, al sheteldikterdiń sany tómendep otyr - J. Túımebaev
ASTANA. Qańtardyń 27-si. QazAqparat /Qanat Mámetqazyuly/ - Elimizde sońǵy kezde jetimderdi asyrap alǵysy keletin qazaqstandyq azamattardyń sany artyp, kerisinshe bala asyrap alǵysy keletin sheteldikterdiń sany kemip otyr.
Bul týraly búgin QR Parlamenti Májilisiniń jalpy otyrysynda «Qazaqstan Respýblıkasynyń balalardy qorǵaý jáne balany sheteldik asyrap alýǵa qatysty yntymaqtastyq týraly konventsııaǵa qosylýy jáne ratıfıkatsııalaýy týraly» zań jobasyn talqylaý barysynda QR Bilim jáne ǵylym mınıstri Janseıit Túımebaev málim etti, dep habarlaıdy QazAqparat.
«Jetim bala asyrap alǵysy keletin qazaqstandyq azamattar sany jyldan-jylǵa artyp otyr. Búgingi kúni ózimizdiń otandastarymyz myńnan astam jetim balany óz otbasynyń tárbıesine alýǵa tilek bildirip, qazir kezekte tur. Ótken jyly 3 myńnan astam jetim bala qazaqstandyq azamattardyń otbasylaryna berildi. Bul 2008 jylmen salystyrǵanda 271 balaǵa artyq. Kerisinshe, sheteldik azamattardyń qazaqstandyq balalardy asyrap alý sany azaıǵany baıqalady. Eger 2008 jyly sheteldikter 749 balany asyrap alsa, ótken 2009 jyly bul kórsetkish 40 balaǵa azaıdy», dedi mınıstr.
Sonymen birge, balany asyrap alýǵa qatysty arnaıy saraptama jumystary júrgizilgenin aıtqan J. Túımebaev, bunyń negizinde qazaqstandyq bala asyrap alýshylardyń basym kontıngentiniń 95 paıyzy ortasha tabysty azamattar bolsa, qalǵan 5 paıyzy joǵary materıaldyq jaǵdaıy bar azamattar ekenin atap ótti. Al elimizden bala asyrap alýǵa nıet bildirgen sheteldikterdiń deni (91 paıyzy) aýqattylar bolyp shyqqan. Sheteldikterdiń arasynda 800-ge jýyǵy iri kompanııa basshylary, 18-i belgili saıasatshylar bolsa, 1,5 myńnan astamy advokattar men sýdıalar, ártister jáne sportshylar bolǵan. «Qazaqstannan bala asyrap alǵysy kelgen sheteldikterdiń qatarynda ataqty AQSh senatory, Saýda-óndiristik palatasynyń tóraǵasy Kroýlı, B. Klıntonnyń keńesshisi K. Temsı, ıspandyq telejuldyz Marııa Martınes, Ulttyq hokkeı lıgasynyń ataqty oıynshysy Haıdı, ıspandyq opera ánshisi H. K. Rassado jáne taǵy basqalary bar. Al qazaqstandyq bala asyrap alǵysy kelgenderdiń arasynda Parlament jáne máslıhat depýtattary, 20-ǵa jýyq túrli mınıstrlikter men vedomstvolardyń qyzmetkerleri de bar», dedi mınıstr.
