Jetimder úılerinde 76 mln teńgeniń zań buzýshylyqtary anyqtaldy

NUR-SULTAN. QazAqparat - Qarjylyq barlaý Qarjylyq monıtorıng agenttiginiń aýmaqtyq departamentterimen birlesip, jetim balalar men ata-ana qamqorlyǵynsyz qalǵan balalarǵa arnalǵan mekemelerde 21 zań buzýshylyǵyn anyqtady. Jalpy shyǵyn somasy 76 mln astam teńgeni quraǵan, dep habarlaıdy QazAqparat.

«Eń jıi jasalǵan buzýshylyqtar qatarynda qyzmetkerlerge jalaqyny zańsyz esepteý jáne olardy býhgalterlerdiń ıelenýi, taýarlar men azyq-túlikti joǵary baǵamen satyp alý, senip tapsyrylǵan múlikti ysyrap etý sııaqty derekter boldy.

Mysaly, mekemelerdiń birinde zaǵıptarǵa arnalǵan baǵdarlamalyq qamtamasyz etýi bar noýtbýkterdi satyp alý kezinde bıýdjetke keltirilgen shyǵyn 17 mln teńgeden asty.

Aýmaqtar men ǵımarattardy abattandyrýǵa jáne aǵymdaǵy jóndeýine arnalǵan bıýdjet qarajatyn urlaý derekteri de oryn aldy. Máselen, jetim balalar men ata-ana qamqorlyǵynsyz qalǵan balalarǵa arnalǵan bir arnaıy mektep-ınternatta 3 mln teńge jymqyrylǵan. Qarajat ashana shatyryn jóndeýge bólingen.

Qazirgi ýaqytta barlyq buzýshylyqtar boıynsha tergeý sharalary júrgizilýde», - delingen QR Qarjylyq monıtorıng agenttiginiń habarlamasynda.

Málim etilgendeı, barlyq anyqtalǵan fakti Ekonomıkalyq tergeý qyzmetine jetkizildi.