Jetimder úıinde tárbıelengen aqtóbelik áıel analar úıin panalap júr
AQTÓBE. QazAqparat - Aqtóbedegi Tamdy balalar úıinde tárbıelengen Nadejda ıÝreva 23 jasynda Analar úıin panalap júr. Búgin aqtóbelik depýtattar jas analardyń jaǵdaıyn bilip, olarǵa shaǵyn syı jasady.
Aqtóbedegi Analar úıinde 9 adam turady. Jas analar bir úıdiń balasyndaı tatý, uıymshyl. Taǵdyry bir jandar arasynda jetimder úıinde tárbıelenip, keıin Aqtóbe qalasyna kelip, páter jaldaǵan, jumys istegen Nadejda ıÝreva bar.
«Aqtóbe qalasyna kelgen soń ártúrli jumystardy istedim. Eden jýdym, ydys jýdym. Túrli salada eńbektenip, nanymdy taptym, páter aqysyn tóledim. Júkti ekenimdi bilgen soń meni jumystan shyǵaryp jiberdi, kezdesip júrgen jigit te bas tartty. Armanym otbasy quryp, balaly bolý edi. Biraq bul baqyt buıyrmady. Barar jerim qalmaǵan soń Analar úıine keldim. Bir aıdan beri qaıyrymdy adamdardyń janynda júrmin»,- dedi Nadejda ıÝreva.
Balalar úıiniń tárbıelenýshisi týa bitti dertke shaldyqqan. Onyń jambas súıegi qısaıyp ketken. Jalǵyz ózine ǵana senip, tirlik etip júrgen Nadejda ıÝreva Aqtóbe oblysy, Mártók aýdanynda 116 bolyp páter kezeginde tur.
«Jaısań kolledjinde bilim alyp, tiginshi mamandyǵyn meńgerdim. Jumys istep júrgen kezde súıiktimmen kezdesip, bolashaqqa jospar qurǵan edik. Ata-anasy qarsy boldy. Men jetim óstim, múgedekpin. Qazir osy jaǵdaıǵa túsip, qınalyp júrmin. Óz baspanam bolsa balamdy baýyryma basyp, tárbıeler edim»,- dedi Nadejda ıÝreva.
Ártúrli sebeppen Analar úıine túsken aqtóbelikterge búgin «Nur Otan» partııasynyń oblystyq fılıal qyzmetkerleri, máslıhat depýtattary bardy. Otbasy kúnine oraı arnaıy syılyqtar berdi. Partııanyń oblystyq fılıalynyń bólim basshysy Aqylbek Sahıevtiń aıtýynsha, «Baqytty otbasy - baqytty balalyq shaq» jobasy aıasynda jas analarǵa kómek kórsetiledi.
Aqtóbedegi Analar úıi 20 adamǵa arnalǵan. Qazir 9 adam turyp jatyr.
«Bizge keletinderdiń kóbi aýylda týyp-ósken jas qyzdar jáne balalar úıiniń burynǵy tárbıelenýshileri. Ótken jyldary áke-sheshesinen seskenip, júktiligin bildirtpeý úshin Qyzylorda jáne Qostanaı, Atyraý oblysynan kelgender de boldy, - dedi «Ana úıiniń» úılestirýshisi Tansulý Lakova.
