Jetimder úıi: Aqtóbelik 6 jyl kóz jazyp qalǵan ápkesimen qaýyshty
Aqtóbedegi Alǵa balalar úıine kishkentaıynda tapsyrylǵan Qaıyrmaǵambet Shakıbaev keıin Tamdy, Jaısań balalar úıine jiberildi. Uzaq jyl boıy bir-birinen ajyrap qalǵan baýyrlar jańa jyl merekesi qarsańynda qaıta qaýyshty.
Jaısań mektep-ınternatynyń tárbıelenýshileri, múmkindigi shekteýli jandar men áleýmettik jaǵynan az qamtylǵan otbasynyń 170 balasyna syılyqtar tapsyrdy. Olardyń arasynda tuldyr jetim balalar men ata-anasy sábıler úıine tapsyrǵan tárbıelenýshiler bar. Jańa jyl merekesinde 16 jastaǵy Qaıyrmaǵambet Shakıbaev týǵan ápkesimen kezdesti. Olar taǵdyr taýqymetimen 5-6 jyl buryn bir-birinen ajyrap qalǵan.
«Qaıyrmaǵambet kópbalaly otbasynan shyqqan. Balalar úıine kelgen soń onyń týystary baýyrynan kóz jazyp qalǵan. Jańa jyl merekesinde qaıta tabysyp, kóńili alań bolyp júrgen bala jylap aldy. Baýyrlaryn saǵynǵany bilinip turdy. Balalar úıiniń ár tárbıelenýshisi anam tabylsa, kelip alyp ketse dep ańsaıdy. Aǵam, apam bolsa dep tilegin aıtady»,- dedi Jaısań balalar úıiniń tárbıeshisi Nurgúl Blınova.
Jańa jyldyq merekeni «Nur Otan» partııasyndaǵy «Kásipkerlerdiń quqyǵyn qorǵaý qaýymdastyǵy» zańdy tulǵalar birlestiginiń bastaýysh partııa uıymy ótkizdi. «Qamqorshylyq zabota» qaıyrymdylyq qory balalarǵa arnaıy syı jasady. Sonymen qatar, jergilikti kásipkerler, «Aqtóbe» fýtbol klýbynyń oıynshylary men sportshylar da syılyq úlestirdi.
«Bir aı buryn balalar Aıaz ataǵa hat jazdy. Basty demeýshilerimizdiń biri - «Aqtóbe» fýtbol klýby. Fýtbolshylardyń árqaısysyna bir balanyń hatyn berip, olardyń arman-tilekteri túgel oryndaldy. Damýy tejelgen balalar oıynshyqtar ǵana surady. Olar kólik, qýyrshaq, shańǵy, úlken tikushaqpen oınaǵysy keledi. Al Q.Jubanov atyndaǵy Aqtóbe óńirlik memlekettik ýnıversıtetiniń stýdentteri aqsha jınap, bir balaǵa velosıped syılady»,- «Úmit oty» qaıyrymdylyq uıymynyń múshesi Ardaq Orynbasarova.
Aqtóbelik balalar aldymen ertegi tamashalady. Olardyń kóbi únemi qaıyrymdy jandardan qarjylaı kómek alyp turady.