Jetimder men ata -ana qamqorlyǵynsyz qalǵan balalardyń 80 paıyzy baspanaǵa muqtaj

Bul týraly búgin Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine jetim balalar men ata-anasynyń qamqorlyǵynsyz qalǵan balalardyń turǵyn úıge quqyqtaryn qamtamasyz etý máseleleri boıynsha ózgerister men tolyqtyrýlar engizý týraly» zań jobasyn birinshi oqylymda talqylaý barysynda málim boldy.

Qujattyń maqsaty balalardyń atalǵan sanatynyń turǵyn úı máselelerin sheshý, áleýmettik-ekonomıkalyq jaǵdaıyn jaqsartý, olardy áleýmettik jaǵynan beıimdeý bolyp tabylady. Bul rette zań jobasymen Salyq kodeksine, Ákimshilik quqyq buzýshylyq týraly kodekske jáne «Turǵyn úı qatynastary týraly», «Qazaqstan Respýblıkasyndaǵy balanyń quqyqtary týraly» zańyna ózgerister engizý qarastyrylady.

«Qoldanystaǵy zańnamaǵa monıtorıng júrgizý barysynda jetim jáne ata-ana qamqorlyǵynsyz qalǵan balalardyń quqyn qorǵaýǵa qatysty olqylyqtar anyqtaldy. Atap aıtqanda osy sanattaǵy balalardyń turǵyn úı alý quqyǵynyń buzylýyna jol berilip keledi. Máselen, jergilikti atqarýshy organdarǵa osy sanattaǵy balalardy baspanamen qamtamasyz etý mindeti júktelgen. Alaıda, qazirgi ýaqytta osy sanatqa jatatyn 34 myńnan astam balanyń 27 myńnan astamy, ıaǵnı 80 paıyzǵa jýyǵy baspanaǵa muqtaj», deıdi Bilim jáne ǵylym vıtse- mınıstri Murat Ábenov. Onyń aıtýynsha, sońǵy jeti jylda balalar úılerin 14 myń bitirýshisiniń 849-y, ıaǵnı alty paıyzy ǵana turǵyn úımen qamtylǵan.

Vıtse-mınıstrdiń sózine qaraǵanda, buǵan sebep jergilikti atqarýshy organdardyń tıisti túrde jumys istemeýi, sonymen birge olarǵa eshqandaı jaýapkershiliktiń qarastyrylmaýy bolyp tabylady. «Soǵan baılanysty mańyzdy tolyqtyrýlar engizilip otyr. Bul rette atalǵan sanattaǵy balalardy baspanamen qamtamasyz etýde mindetin durys atqarmaǵan jergilikti basshylarǵa jaýapkershilik kózdeledi», dedi M. Ábenov.