Jetim jáne múgedek balalar úshin jataqhana qunynyń 50% memleket ótemek

ASTANA. QazAqparat – «Áleýmettik kómek kórsetiletin azamattarǵa áleýmettik kómektiń mólsherin, kózderin, túrlerin jáne ony berý qaǵıdalary týraly» Úkimet qaýlysyna ózgerister engizilmek, dep habarlaıdy QazAqparat tilshisi.

«Memleket bilim alý kezeńinde jetim jáne ata-anasynyń qamqorlyǵynsyz qalǵan balalarǵa, múgedektigi bar adamdar men múgedektigi bar balalarǵa arnalǵan shyǵystardy ishinara óteıdi», - delingen «Ashyq» NQA portalynda jarııalanǵan Úkimet qaýlysynda.

Aıta keteıik, qoldanystaǵy erejege sáıkes, atalǵan sanattaǵy bilim alýshylardyń ishinara shyǵyny memleket tarapynan ótelmeıdi. Sonymen qatar, endi joǵary oqý oryndarynda oqıtyn jetim jáne múgedek baralardyń jatahana shyǵystarynyń 50%-yn Úkimet jabady.

«Memleket kórsetilgen sanattaǵy azamattarǵa joǵary bilim berý uıymdarynda oqý kezeńinde jataqhanalarda turǵany úshin 29 aılyq eseptik kórsetkishten (96 600 teńge) aspaıtyn turý qunynyń 50 paıyzy mólsherinde shyǵystardy óteıdi», - dep ózgeris engizilgen qaýlyǵa.

Qujat 28 naýryzǵa deıin kópshilik talqylaýda bolady.