Jetim jáne qamqorlyqsyz qalǵan balalardyń derekter bazasy jasalady - B.Áıtimova
ASTANA. QazAqparat - Qazaqstanda jetim jáne ata-ana qamqorlyǵynsyz qalǵan balalardyń derekter bazasy jasalady. Búgin QR Parlamenti Senatynyń jalpy otyrysynda senator Birǵanym Áıtimova málim etti. Jalpy otyrysta «Qazaqstan Respýblıkasynyń keıbir zańnamalyq aktilerine balanyń quqyqtaryn qorǵaý máseleleri boıynsha ózgerister men tolyqtyrýlar engizý týraly» zań jobasy talqylanǵan bolatyn.
Depýtattyń aıtýynsha, jetim jáne ata-ana qamqorlyǵynsyz qalǵan balalardyń derekter bazasyn jasaý týraly tapsyrmany Elbasy júktegen bolatyn. Sonymen qatar, Prezıdent balalar úıinde tárbıelenetin sábıler men jasóspirimder sanyn azaıtýdy da júktegen edi.
«Qazir respýblıkamyzda bes mıllıonnan astam balalar bar. Olardyń toǵyz myńǵa jýyǵy balalar úıinde tárbıelenýde. Zań jobasyna sáıkes, jetim jáne ata-ana qamqorlyǵynsyz qalǵan balalar respýblıkalyq derekter bazasynyń esebine qoıylatyn bolady.
Bul - mindetti talap. Ondaı júıe jetim jáne qamqorlyqsyz qalǵan balalardyń quqyǵyn qorǵaýmen aınalysatyn barlyq memelkettik organdardyń, ortalyq jáne jergilikti deńgeıde, sonymen birge, Qazaqstannyń shetelderdegi mekemelerine ózara árekettesý jáne aqparat almasýyn qamtamasyz etedi», - dedi depýtat B. Áıtimova.
Onyń sózine qaraǵanda, respýblıkalyq derekter bazasynyń qurylýy úshin respýblıkalyq bıýdjetten 120 mıllıon teńge qarastyrylady.
«Sonymen birge, ata ana qamqorlyǵynsyz qalǵan balalar men olardy óz otbasyna qabyldaıtyn azamattar týraly qupııa aqparatqa qol jetkizý máselesi de qarastyrylady. Bul rette atalǵan sanattaǵy balalar týraly derekter bankisiniń tolymdy aqparatty úkimettik emes uıymdardyń alýyna da múmkindikter beriledi»,- dedi B. Áıtimova.
