Jetim jáne ata-anasynyń qamqorlyǵynsyz qalǵan balalardyń 84 paıyzy baspanaǵa muqtaj
ASTANA. 31 naýryz. QazAqparat - Keshe Bilim jáne ǵylym vıtse-mınıstri Mahmetqalı Sarybekovtiń tóraǵalyǵymen «Qazaqstan Respýblıkasynyń keıbir zańnamalyq aktilerine jetim balalar men ata-anasynyń
qamqorlyǵynsyz qalǵan balalardyń turǵyn úıge quqyqtaryn qamtamasyz etý máseleleri boıynsha ózgerister men tolyqtyrýlar engizý týraly» QR Zańynyń jobasyn ázirleý jónindegi jumys tobynyń ekinshi otyrysy ótti. Bul aqparatty atalǵan vedomstvonyń baspasóz qyzmeti taratyp otyr.
Mıınstrliktiń aqparaty boıynsha, qazirgi ýaqytta respýblıkada 36 777 jetim balalar men ata-anasynyń qamqorlyǵynsyz qalǵan balalar bar, olardyń 16 paıyzy ǵana bekitilgen úılerge ıe. Qalǵan 84 paıyzy turǵyn úıge muqtaj. 2006-2011 jyldar kezeńinde memlekettik turǵyn úı qorynan 500-ge jýyq jetim bala turǵyn úımen qamtamasyz etildi. Atalǵan sanattaǵy balalardy qosymsha qoldaý maqsatynda respýblıkada 33 jasóspirimder úıi jumys isteıdi, onda balalar úıleriniń 23 jasqa deıingi bitirýshileri áleýmettik beıimdelýden ótedi.
Atalǵan máseleniń áleýmettik mańyzdylyǵyn eskere otyryp, jumys tobynyń músheleri Qazaqstan Respýblıkasynyń keıbir zańnamalyq aktilerine ózgerister engizý úshin usynystar daıyndady.
Jumys toby músheleriniń nazaryna jetim balalardyń turǵyn úıge quqyqtaryn júzege asyrý jónindegi turǵyn úı saıasatyna jasalǵan taldaý, usynystaryn eskere otyryp daıyndalǵan salystyrma keste, halyqaralyq tájirıbe, Qazaqstan Respýblıkasynyń normatıvtik quqyqtyq aktileri, óńirlik josparlar, statıstıkalyq derekter usynyldy.
Kezekti otyrys barysynda turǵyn úı alýda múgedekter men Uly Otan soǵysyna qatysýshylarmen qatar jetim balalarǵa da basymdyq quqyq berý jónindegi usynystar talqylanyp, qoldaý tapty.
Jetim balalar men ata-anasynyń qamqorlyǵynsyz qalǵan balalardyń ózderinde bar turǵyn úılerin saqtaý tetikterin ázirleý qajettigi týraly qyzý pikirtalas ótti. Budan basqa, notarıattyq is-áreketter jasaǵan kezde memlekettik baj tóleýden, sondaı-aq jyljymaıtyn múlikke quqyqtardy tirkegeni úshin alymdar tóleýden bosatý máselesine erekshe nazar aýdaryldy.
Talqylaýdyń qorytyndysy boıynsha jumys tobynyń músheleri tarapynan aıtylǵan usynystardy eskere otyryp, zań jobasyn pysyqtaý boıynsha sheshim qabyldandy.
Zań jobasyn kelesi talqylaý jumys tobynyń aǵymdaǵy jylǵy sáýirde ótetin úshinshi otyrysyna josparlanǵan.
