Jetim jáne ata-anasynyń qamqorlyǵynsyz qalǵan 42 myńnan astam bala anyqtaldy - Balalar quqyn qorǵaý komıteti
ASTANA. Mamyrdyń 17-si. QazAqparat /Rýslan Ǵabbasov/ - Búgin Astanada Balalar quqyǵy týraly konventsııanyń 20 jyldyǵyna oraı «Balalyq shaqty qorǵaý jáne iske asyrý joldary» taqyrybynda Ortalyq Azııalyq ǵylymı-tájirıbelik konferentsııa ótip jatyr,
dep habarlaıdy QazAqparat.
«Búginde respýblıkada 18 jasqa deıingi 4 mıllıon 755 myń 902 bala bar. Onyń ishinde mektep jasyna deıingi, mektep jasyndaǵy, sondaı-aq oqıtyn jastar da bar. Sonymen birge balalardyń osy kategorııasynyń arasynda ótken jyly damýynda múmkindigi shekteýli 150 myńǵa jýyq jasóspirim anyqtaldy», - dedi Bilim jáne ǵylym mınıstrliginiń balalar quqyn qorǵaý komıtetiniń tóraıymy Raısa Sher.
Onyń sózine qaraǵanda, jetim jáne ata-anasynyń qamqorlyǵynsyz qalǵan 42 myńnan astam bala anyqtaldy.
«Alaıda, osy 42 myń jasóspirimniń barlyǵy balalar úıinde emes. Onyń ishinde 25 myńy Qazaqstan azamattarynyń qamqorlyǵyna alynǵan. Sondaı-aq 2 myńnan astam bala respýblıkadaǵy otbasylarda tárbıelenýde. Al 15 myń bala densaýlyq saqtaý, halyqty áleýmettik qorǵaý, bilim berý júıesiniń uıymdarynda ómir súrip, tárbıe alýda. Osy 15 myńnyń ishindegi tek 2 myńnan astamy - jetimder, al qalǵandarynyń ata-analary bar», - dedi R. Sher.
Komıtet basshysynyń aıtýynsha, BUU-nyń balalar quqy jónindegi komıtetiniń usynysyna sáıkes elimizde Ulttyq is-qımyl josparyn iske asyrý kerek. «Búginde osyndaı ulttyq is-qımyl josparyna 2007-2011 jyldarǵa arnalǵan «Qazaqstan balalary» baǵdarlamasyn jatqyzýǵa bolady. Bıylǵy jyly bul baǵdarlamanyń ekinshi kezeńi bastalady»,-dedi ol. Qazirgi kezde elimizde balalyq shaq máselesimen aınalysatyn 600-ge tarta úkimettik emes uıymdar bar.
Sharany «Nur Otan» HDP, QR Bilim jáne ǵylym mınıstrligi, Qazaqstandaǵy «Daǵdarys ortalyqtarynyń odaǵy» zańdy tulǵalar birlestigi uıymdastyryp otyr.
