Jetim jáne ata-anasynyń qamqorlyǵynsyz qalǵan 3 myńnan astam bala qashyqtan oqyp jatyr
NUR- SULTAN. QazAqparat - Jetim balalar men ata-anasynyń qamqorlyǵynsyz qalǵan balalarǵa arnalǵan 78 uıymda 3 myńnan astam tárbıelenýshi qashyqtan bilim berý tehnologııalarymen oqyp jatyr, dep habarlaıdy QazAqparat QR BǴM Balalardyń quqyǵyn qorǵaý komıtetine silteme jasap.
Mektep muǵalimderi men jetim balalarǵa arnalǵan uıymdar tárbıeshileriniń tyǵyz tandemi, tıimdi sheshimderdi tańdaý, balalar men eresekterdi kompıýterlermen, planshettermen jáne basqa da gadjettermen ýaqtyly qamtamasyz etý qashyqtan oqýdy aýyrtpalyqsyz bastaýǵa kómektesti.
«EL ARNA» jáne «Balapan» telearnalarynda uıymdastyrylǵan beıne-sabaqtardy, sondaı-aq Daryn.online, Kundelik.kz jáne Opiq.kz bilim berý ınternet-platformalaryn paıdalanýdy balalar qyzyǵýshylyqpen jáne yqylaspen qabyldady.
Balalardyń densaýlyǵyn saqtaý úshin eriktiler toptaryna, metsenattarǵa jáne basqa da bógde adamdardyń kirýine tyıym salynǵan, úı-jaılarda qoldy óńdeýge arnalǵan antıseptıkalyq quraldar ornatyldy. Buǵan qosa turaqty negizde úı-jaılardy jeldetý júrgiziledi, tárbıelenýshilerdiń jeke gıgıenasyn saqtaýǵa baqylaý kúsheıtildi, kún saıyn medıtsına qyzmetkerleri balalardyń temperatýrasyn ólsheıdi.
Sonymen qatar qyzmet kórsetýshi personaldyń balalarmen baılanysyn barynsha azaıtý úshin jumys kestesi ózgertilip, barlyq kelgen qyzmetkerlerdi medıtsınalyq tekserý jáne olardy jetkizý qamtamasyz etildi.
