Jetim balalarǵa «Sıqyrly qobdısha» syılanady
ASTANA. 26 qarasha. QazAqparat - Qazirgi ýaqytta Astana qalasynda 1028 jetim bala bolsa, olardyń 348-i qalanyń ınternat mekemelerinde tárbıelenýde. Tuńǵysh Prezıdent kúnine Astana qalasynyń ákimdigi ata-anasynyń qamqorlyǵynsyz qalǵan balalarǵa áleýmettik aktsııa ótkizýdi qarastyrǵan, dep habarlady Astana qalasynyń resmı saıty.
«1000 bala tátti syılyqtar alady. Jetimder men turmysy tómen otbasynyń balalaryna: qyzdar úshin qolóner buıymdary jıyntyǵy, uldar úshin aǵash ustasy jıyntyǵy «Sıqyrly qobdısha» syılanady, - dep málimdedi Astana qalasy Bilim basqarmasy bastyǵynyń orynbasary Rımma Imanǵazınova.
Sonymen qatar, onyń aıtýynsha, Jańa jyl qarsańynda 150 jetim balaǵa planshetti kompıýter, oıynshyqtar men tátti syılyqtar beriledi.
