Jetim balalardyń turǵyn úıge quqyǵyn qamtamasyz etetin QR Zańy qabyldandy

Atalǵan qujattyń maqsaty jetim balalar men ata-ana qamqorlyǵynsyz qalǵan balalardyń turǵyn úı máselelerin sheshý, olardyń áleýmettik-ekonomıkalyq jaǵdaıyn jaqsartý, sondaı-aq osy sanattaǵy balalardy áleýmettik jaǵynan beıimdeý bolyp tabylady. Bul rette zań jobasymen Salyq kodeksine, Ákimshilik quqyq buzýshylyq týraly kodekske jáne «Turǵyn úı qatynastary týraly», «Qazaqstan Respýblıkasyndaǵy balanyń quqyqtary týraly» zańyna ózgerister engizý qarastyrylady.

Atap aıtqanda, jergilikti atqarýshy organdarǵa osy sanattaǵy balalardy baspanamen qamtamasyz etý mindetin júzege asyrý boıynsha zańnamalyq deńgeıdegi jaýapkershilik júkteledi. Budan bólek, jetim jáne ata-anasynyń qamqorlyǵynsyz qalǵan balalardyń páter kezegine basym quqyq berý kózdeledi. Olardyń baspana muqtajyn sheshý úshin osy sanatty memlekettik turǵyn úıge jeke esepke alý týraly norma qamtylady.

«Bilim berý uıymdaryndaǵy, medıtsınalyq jáne ózge de uıymdardaǵy, onyń ishinde qoǵamnan ýaqytsha oqshaýlaýdy qamtamasyz etetin uıymdardaǵy jetim balalar men ata-ana qamqorlyǵynsyz qalǵan balalardyń turǵyn úıge menshik quqyǵyn nemese paıdalaný quqyǵyn saqtaıtyn norma engizilgen. Osy sanatqa jatatyn on tórt jasqa tolmaǵan balalardyń turǵyn úılerin ıelikten shyǵarý jónindegi mámileler jasaýǵa nemese olardyń atynan muragerlik quqyqtan bas tartýǵa ákeletin mámileler jasaýǵa tyıym salynady», delingen túsindirme jazbada.

Toqtala keteıik, qazirgi ýaqytta jetim jáne ata-anasynyń qamqorlyǵynsyz qalǵan balalardyń sany 34 myńnan asady. Onyń 27 myńnan astamy, ıaǵnı 80 paıyzǵa jýyǵy baspanaǵa muqtaj bolyp otyr.

Parlament qabyldaǵan zań Memleket basshysynyń qol qoıýyna joldanady.