Jetim balalardyń quqyqtaryn buzǵan 160-tan astam adam jazalandy - Bas prokýratýra

ASTANA. QazAqparat - Bas prokýratýra 2013 jyldyń tórtinshi toqsanynda bala asyrap alý zańnamasyn oryndalýyna tekserý júrgizip, onyń nátıjesinde jetim balalardyń quqyqtaryn buzǵany úshin 160-tan astam adam jazalandy.

Bul týraly QazAqparat tilshisine QR Bas prokýratýrasynyń departament basshysy Qanat Seıdǵapbarov habarlady.

«Tekseris qorytyndysy boıynsha prokýratýra organdarymen prokýrorlyq qadaǵalaýdyń 166 aktisi engizilip, 800-den astam balanyń quqyǵy qorǵaldy. Jaýapkershiliktiń túrli deńgeılerine 162 adam tartylyp, onyń ishinde 8-i qylmystyq jazaǵa kesildi»,-dedi ol.

Onyń sózine qaraǵanda, tekseris nátıjesi Úkimet músheleriniń, depýtattyq korpýstyń jáne úkimettik emes uıymdar ókilderiniń qatysýymen Bas prokýratýranyń keńeıtilgen alqa májilisinde qaraldy.

«Úkimetke tıisti usynys engizilip, onda bala asyrap alý salasynda zańdylyqty qamtamasyz etý men kámeletke tolmaǵandardyń jáne bala asyrap alýǵa kandıdattardyń quqyqtaryn buzýǵa jol bermeý máseleleri qamtyldy»,- dep atap ótti Q. Seıdǵapbarov.

Belgili bolǵandaı, 2013 jyly prokýrorlyq qadaǵalaý barysynda perzenthanalar qyzmetkerleri tarapynan resmı qujattardy qoldan jasaý faktileri anyqtaldy. Bundaı qadamdar jańa týǵan nárestelerdi azamattarǵa zańsyz asyrap alýǵa berý maqsatynda jasalǵan. Barlyq faktiler (7 oqıǵa) boıynsha qylmystyq ister qozǵaldy.