Jetim balalardy baspanamen qamtýda ShQO tájirıbesin úırengenimiz jón- B.Saparbaev
ASTANA. QazAqparat - Búgin bilim berý júıesi qyzmetkerleriniń respýblıkalyq tamyz keńesinde QR Premer-Mınıstriniń orynbasary Berdibek Saparbaev mektep jasyndaǵy jetim balalardy bolashaqta baspanamen qamtý jaıyna nazar aýdartty.
«Bilim berý júıesindegi taǵy bir másele - jetimderdiń jaǵdaıy. Shyndyqty moıyndaıyq, elimizde jetimderdiń azaımaı otyrǵanyna kóbinese kináli - úlkender. Sondyqtan, olarǵa únemi qoldaý kórsetip, kómektesý - bizdiń paryzymyz. Shyǵys Qazaqstan oblysynda jaqsy bir bastama boldy. «Meıirim» degen aktsııa aıasynda biz «balany asyrap alýshy - jetim bala - «Turǵyn úı jınaq banki» degen kestemen 1 mln teńgeden bastalatyn jınaq kelisimshartyn jasaıtynbyz. Soǵan sáıkes, jetim bala oqý bitirgen kezde baspanaly bola alatyn. Sonymen qatar, Úkimet «Qoljetimdi baspana» baǵdarlamasy boıynsha jetim balalarǵa arnaıy úı salý týraly sheshim qabyldady»,-degen B.Saparbaev Shyǵys Qazaqstan oblysyndaǵy taǵy bir ıgi bastamany mysalǵa aldy.
«Meni maqtanyp tur dep oılamańyzdar, biraq biz Shyǵys Qazaqstan oblysynyń tájirıbesin úırenýimiz kerek. Biz oblysta árbir jetim bala úshin biz bir adamdy jaýapty etip qoıatynbyz. Oǵan materıaldyq kómek berý úshin emes, ol bala otbasy jylýyn sezinip, tárbıe alýy úshin. Sondyqtan, osy máseleni qolǵa alý kerek»,-deı kele B.Saparbaev BǴM ishindegi bala quqyǵyn qorǵaý komıtetiniń jumysyn pysyqtaý kerek dep tapsyrma berdi.
