Jetim balalardy baspanamen qamtý soǵys ardagerlerimen birdeı deńgeıde sheshimin tabýy tıis - vıtse-mınıstr
ASTANA. 24 jeltoqsan. QazAqparat - Búgin Májilistiń Áleýmettik-mádenı damý komıtetinde depýtattar
«Qazaqstan Respýblıkasynyń keıbir zańnamalyq aktilerine jetim balalar men ata-anasynyń qamqorlyǵynsyz qalǵan balalardyń turǵyn úıge quqyqtaryn qamtamasyz etý máseleleri boıynsha ózgerister men tolyqtyrýlar engizý týraly» zań jobasyn talqylady.
Atalǵan zań jobasy jetim balalar men ata-anasynyń qamqorlyǵynsyz qalǵan balalardy, sonyń ishinde qamqorshylyqtaǵy nemese qorǵanshylyqtaǵy, patronattyq tárbıedegi balalardyń turǵyn úıge quqyqtaryn qamtamasyz etý aıasyndaǵy qoldanystaǵy zańnamany jetildirý qajettiliginiń týyndaýyna baılanysty ázirlendi. Bul rette zań jobasy laýazymdy adamdardyń, sondaı-aq jetim balalar men ata-anasynyń qamqorlyǵynsyz qalǵan balalardyń zańdy ókilderiniń atalǵan sanattaǵy balalardy memlekettik turǵyn úı qorynan turǵyn úı alý úshin esepke qoıýy boıynsha jaýapkershiligin arttyrýdy qarastyrady. Memlekettik turǵyn úı qorynan turǵyn úıge muqtaj jetim balalar men ata-anasynyń qamqorlyǵynsyz qalǵan balalardy esepke qoıýdyń biryńǵaı tártibi jasalatyn bolady. Budan bólek, qujatta jetim balalar men ata-anasynyń qamqorlyǵynsyz qalǵan balalardy turǵyn úımen birinshi kezekte qamtamasyz etýge basa nazar aýdarylyp otyr.
«Jetim balalar soǵys ardagerleri sııaqty áleýmettik sanattaǵy alǵashqylardyń biri bolyp baspanaǵa qol jetkizýleri kerek. Bizdiń memlekette jetim balalarǵa úı berý máselesine belgili bir deńgeıde basymdyq berilmegen. Zań jobasy arqyly biz jetim balalardy soǵys ardagerlerimen qatar áleýmettik sanattaǵy alǵashqylardyń biri bolyp úı alý jaǵyn qarastyrǵymyz keledi. Ázirge olar eń birinshi bolyp memleketten páter alýǵa quqyly 11 áleýmettik sanattyń 9-shy satysynda tur», - dedi Bilim jáne ǵylym vıtse-mınıstri Saıat Shaıahmetov.
