Jetim balalardy baspanamen qamtý baǵdarlamasy kerek - senator

ASTANA. QazAqparat – Senator Amangeldi Tolamısov Úkimet basshysy Álıhan Smaıylovtyń atyna joldaǵan depýtattyq saýalynda jetim jáne ata-anasynyń qamqorlyǵynsyz qalǵan balalardyń turǵyn úı alý máseleleri týraly aıtty, dep habarlaıdy QazAqparat tilshisi.

Parlament depýtaty elimizde mundaı balalardyń memlekettik turǵyn úı qorynan birinshi kezekte baspana alýǵa quqyǵy bar ekenin eske saldy. Qazirgi kezde bul sanatta turǵyn úı alý kezeginde 60 845 azamat tur. Byltyr 1 211 adam baspana aldy, al bıyldyń birinshi jartyjyldyǵynda tek 287 adam ǵana turǵyn úımen qamtamasyz etildi.

«Jetim balalar men ata-anasynyń qamqorlyǵynsyz qalǵan balalardy tárbıelenip jatqan mekemelerdiń ornalasqan mekenjaıy boıynsha emes, týǵan jerlerine qatysty turaqty turǵylyqty tirkeýge qoıyp, sol óńirlerde baspana kezegine engizý kerek. Bul óz kezeginde olardyń jyldamyraq baspana alýyna múmkindik beredi. Memlekettik organdar «Otbasy banki» AQ-men birlesip, balalar úıiniń tárbıelenýshileri men jetim balalar sanatynda kezekte turǵan jastarǵa jeńildetilgen turǵyn úı ıpotekalyq baǵdarlamalaryn jáne satyp alý múmkindiginsiz memlekettik jalǵa beriletin páterlerge qatysty baǵdarlamalaryn qarastyrýy tıis», - dedi Amangeldi Tolamısov Senattyń jalpy otyrysynda.