«Jetim balalar úıinsiz Jetisý» jobasy júzege asady
TALDYQORǴAN. QazAqparat - Almaty oblysynda «Jetim balalar úıinsiz Jetisý» jobasy júzege asady. Bul jóninde Májilis depýtaty Zaǵıpa Balıeva málim etti. Taldyqorǵan qalasyndaǵy Til saraıynda ótken basqosýda halyq qalaýlysy atalǵan jobanyń ereksheligine toqtaldy, dep habarlaıdy QazAqparat tilshisi.
«Biz aýyldy jerlerden qora-jaıy, aýlasy, baý-baqshasy bar úılerdi satyp alyp, onda balalardy patronattyq tárbıege alǵysy keletin ata-analardy ornalastyramyz. Ár otbasyna 5-ten, 6-dan bala beriledi. Balalardy jaqsylap tárbıelep, olardy aıaqtandyryp, azamat retinde qalyptastyrsa, úı sol otbasy múshelerine basybaıly beriletin bolady. Bul máseleni Májiliste jan-jaqty talqylap jatyrmyz. Atalǵan baǵdarlamany júzege asyrýǵa qajetti qarjy qarastyrylyp qoıǵan», - dedi Zaǵıpa Balıeva.
Aıta ketý kerek, búgingi tańda Almaty oblysynda 3114 jetim bala bar. Onyń 82 paıyzy otbasylyq tárbıe alyp jatyr. Qalǵany balalar úıinde tárbıelenýde. «Jetim balalar úıinsiz Jetisý» jobasy sol balalarǵa otbasylyq tárbıe berý maqsatynda júzege asyrylǵaly otyr. Ótken jyly 59 bala patronattyq tárbıege ótse, 300-den astam jáýdir kózdi elimizdiń azamattary asyrap aldy. Sońǵy jyldary oblysta jetim balalar sany azaıyp, balalar úıleriniń sany qysqaryp keledi. Ótken jyly Úshtóbe qalasyndaǵy balalar úıi jabyldy. Sebebi, keıingi jyldary ondaǵy tárbıelenýshiler sany kúrt azaıyp ketken.
