«Jetim balalar týraly» arnaıy zań kerek - R. Halmuradov
ASTANA. 13 sáýir. QazAqparat /Qanat Mámetqazyuly/ -Qazaqstanda «Jetim balalar týraly» arnaıy zań kerek. Búgin QR Parlamenti Májilisiniń jalpy otyrysynda Úkimet basshysynyń atyna saýal joldaǵan depýtat Rozaqul Halmuradov osylaı málim etti.
Depýtattyń aıtýynsha, qazirgi tańda Qazaqstanda 46 myńnan astam bala túrli sebeptermen ata-ananyń qamqorlyǵynsyz qalyp otyr. Budan bólek, sońǵy on jyldan beri sheteldikterge 6 myńnan astam jetim bala asyrap alýǵa berilse, onyń 5 myń 308-i AQSh azamattarynyń úlesine tıipti.
«Ókinishke qaraı qoǵamda qatigez, qanypezer ata-ana-symaqtar kóbeıýde. Áıtpese eń qymbattysy, kóziniń qarasy, ómiriniń jalǵasy, baýyr eti balasyn perzenthanaǵa nemese qoqys jáshigine tirideı qaldyrýǵa qalaı júregi daýlaıdy?! Torǵaı ekesh torǵaı da balapanyn qorǵaıdy. Sonda kim bolǵanymyz?! Tarıhta talaı taýqymetti ótkergen bizdiń halqymyzdyń basynda mundaı sumdyq buryn-sońdy bolyp kórmegen. Búgingi tańda tastandy sábıler, shet elderge satylǵan balalar sanynyń kúnnen-kúnge arta túsýi, qyzdarymyzdyń jeńil jolǵa salynýy, «kókek ákelerdiń» kóbeıýi barlyǵymyzdy da tolǵandyratyn ózekti máselege aınalyp otyr. Bolashaq urpaqty osynaý qasiretti indetten qalaı saqtap qalamyz?», - degen depýtat Úkimet tarapynan arnaıy sharalar qabyldanýy tıistigin atap ótti.
«Atqarýshy bılik qamqorlyqqa zárý balalar men sheteldikter asyrap alǵan sábılerdiń jaǵdaıyn retteıtin, jetim balalardy turǵyn úımen, jumys ornymen qamtamasyz etýdi qarastyratyn «Jetim balalar týraly» zań jobasyn daıyndasa ıgi», - dedi ol.
