Jetim balalar arasynda qarakózderimizdiń kóptigi júrek aýyrtady - Saparbaev

Aqtóbe qalasyndaǵy «Úmit» sábıler úıine oblys ákimi Berdibek Saparbaev baryp, balalar ujymyn Jańa jyl merekesimen quttyqtady. Munda qazir 55 bala tárbıelenip jatyr. Balalarǵa medıtsınalyq em kórsetiledi, ońaltý jumystary júrgiziledi. Barlyǵy 23 balany ata-anasy ýaqytsha tapsyrǵan. Al 11-i - tastandy. Sábıler úıiniń bas dárigeri Qadirbek Imanbaevtyń aıtýynsha, bıyl 16 balanyń ata-anasy sábıinen bas tartqan.
 

«Sábıler úıinde bas bostandyǵynan aıyrylǵan, psıhıkalyq aýrýyna baılanysty em alyp jatqan adamdardyń balalary bar. Bıyl montısorrı kabıneti ashyldy. Motorıkalyq mı qyzmetterin damytýǵa arnalǵan kabınette pedagogtar jumys isteıdi. Mamandary arnaıy oqytyldy. Buǵan deıin týa bitti sal aýrýy, Daýn sındromyna shaldyqqandardy saýyqtyrý úshin Almaty, Astanaǵa jiberip, jylyna bir ret em alatyn edik. Qazir óz mamandarymyz úzdiksiz jumys istep, emdeý júrgizedi. Nátıje de jaqsy»,- dedi Qadirbek Imanbaev.
 

«Úmit» sábıler úıimen jan-jaqty tanysyp, balalardyń jaǵdaıyn kórgen oblys ákimi Berdibek Saparbaev arnaıy kontsertti tamashalady.




Keıin ujymǵa alǵysyn aıtyp, merekemen quttyqtady.

«Bul balalarǵa sizder áke-sheshe bolyp, boılaryńyzdaǵy jigerlerińizdi, densaýlyqtaryńyzdy jumsap, tárbıe berip júrsizder. Jumystaryńyz jaýapty, saýapty. Eńbekterińiz Alladan, balalardan qaıtady. Balalar úlken azamat bolsa, sizderge rahmet aıtady. Tek qarakóz balalardyń kóp bolǵany júrekti aýyrtady», - dedi Berdibek Saparbaev.
 



 

Aıta keteıik, «Úmit» sábıler úıinde 0-4 jas aralyǵyndaǵy balalar tárbıelenedi. Keıin sal aýrýyna shaldyqqandar «Jaına» ońaltý ortalyǵyna jiberilip, keıbiri psıho-nevrologııalyq dıspanserge barady. Kóbin balasy joq adamdar asyrap alady. Balalar patronattyq tárbıege, qamqorshylyqqa beriledi.  Bıyl 12 balany qazaqstandyq otbasy, bireýin ıspan eliniń azamaty asyrap aldy. Jalpy «Úmit» sábıler úıine 68 bala tústi. Ókinishke qaraı, sábıler úıine kelgen balalar sany artyp otyr.