«Jetibaı-Jańaózen» jolynyń bir shaqyrymyn salýǵa 1,2 mln dollar jumsalmaq
ASTANA. QazAqparat - «Jetibaı-Jańaózen» jol ýchaskesiniń bir shaqyrymyn salýǵa 1,2 mln AQSh dollary somasynda qarjy jumsalmaq. Bul týraly búgin Senatta QR IDM Avtomobıl joldary komıteti tóraǵasynyń orynbasary Satjan Ablalıev málim etti, dep habarlaıdy QazAqparat.
«Salynatyn joldyń qunyna toqtalatyn bolsaq, ol joldyń sanatyna qurylys júretin óńirge nemese jerdiń bederine baılanysty bolady. Búgingi kúni bizdiń shyǵaryp otyrǵan jobamyzda 1 shaqyrymy (birinshi sanattaǵy tórt jolaqty jol) 1,2 mln dollar shamasynda, ıaǵnı 400 mln teńge kóleminde. Basqa óńirlerde eldi mekenderge jaqyn jerlerde jáne jasandy qurylystar kóp jerlerde jol qurylysynyń quny 600 mln teńgege deıin jetedi», - dedi S. Ablalıev.
Óz kezeginde QR Investıtsııalar jáne damý vıtse-mınıstri Tımýr Toqtabaev «Jetibaı-Jańaózen» ýchaskesin qarjylyndyrýdyń mán-jaıyn túsindirip berdi.
«Zaım týraly negizgi kelisimge 371 mln dollar somasynda 2013 jyly qol qoıyldy jáne zańmen sol jyly ratıfıkatsııalandy. 170 shaqyrymdyq «Shetpe-Aqtaý» jolynyń ýchaskesin qaıta salý jumysy aǵymdaǵy jyldyń sońyna qaraı aıaqtalady. Konkýrstyq rásimder men devalvatsııadan keıin tıisti kólemde qarjy únemdeldi. Úkimet tarapynan 73,3 mln dollar kólemindegi osy qarjyny kórshiles «Jetibaı-Jańaózen» ýchaskesin qaıta salýǵa paıdalaný týraly sheshim qabyldandy. Osy oraıda 2017 jyldyń maýsymynda Qazaqstan men Azııa damý banki arasynda kelisimge qol qoıyldy»,- dedi T. Toqtabaev.
Atalǵan qarjy 73 shaqyrym aralyqtaǵy tórt jáne eki jolaqty qozǵalysy bar asfalt-betondy joldyń qurylysyna baǵyttalady. Sonymen qatar bir jol aıryǵy, eki kópir, 19 sý ótkizý qubyry salynady. Joba 2017-2019 jyldary júzege asyrylady.
