Jeti jylǵa sottalǵan Baqytgúl Hamenova sot úkimine appelıatsııalyq shaǵym túsirdi

ATYRAÝ. QazAqparat – Atyraý oblysy ákiminiń burynǵy orynbasary Baqytgúl Hamenovanyń isine qatysty appelıatsııalyq shaǵymdar tústi, dep habarlaıdy QazAqparat.

Atyraý oblystyq sotynyń baspasóz qyzmetinen málim etkendeı, Baqytgúl Hamenovanyń isine qatysty apellıatsııalyq shaǵymdar túsken.

«Atyraý qalasynyń №2 sotyna B.Hamenovadan, onyń advokaty I.Vranchevtan, Ý.Adamov pen onyń advokaty K.Adamovadan jáne A.Rysqalıevtyń advokaty N.Jolbolovtan apellıatsııalyq shaǵymdar túskenin habarlaımyz. Apellıatsııalyq shaǵymdarǵa baılanysty is áli alqa qaraýyna berilgen joq», - dep habarlady Atyraý oblystyq sotynyń baspasóz qyzmeti.

Budan buryn Atyraýdaǵy №2 qalalyq sot Baqytgúl Hamenovany QR Qylmystyq kodeksiniń 366-babynyń 3-bliminiń 2-tarmaǵymen (Іri kólemde para alý) kináli dep tanyp, 7 jylǵa bas bostandyǵynan aıyrýǵa úkim shyǵardy.

«Sot Baqytgúl Hamenovanyń qabyldaǵan antty buzý arqyly qylmys jasaǵanyn jazany aýyrlatatyn jaǵdaı dep tanydy. Jeńildetetin mán-jaı retinde jas balalarynyń bary eskerildi. Sottalýshyǵa ómir boıyna memlekettik qyzmette laýazymdardy atqarý quqyǵynan ómir boıyna, 7 jyl merzimge bas bostandyǵynan aıyrý jazasy taǵaıyndaldy. Eki jas balasynyń bolýyna baılanysty QR Qylmystyq kodeksiniń 74-babynyń 1-bóligine sáıkes jazany óteý merzimi 3 jylǵa keıinge qaldyryldy», -delingen sottyń habarlamasynda.

Sondaı-aq, Baqytgúl Hamenovamen birge tergelgen oblystyq mádenıet, tilderdi damytý jáne arhıv isi basqarmasynyń basshysy basqarma basshysy 7, seriktestik dırektory 4 jylǵa sottalǵan bolatyn.

«Sot Aqylbek Rysqalıevtyń jazasyn jeńildetetin mán-jaı retinde jas balalarynyń baryn, qylmystyq quqyq buzýshylyqtyń basqa qatysýshylaryn áshkereleýin tanydy. Al, Ómirtaı Adamov úshin jazasyn jeńildetetin mán-jaı retinde zeınetkerlik jasyn, asyraýynda tórt jáne kámeletke tolmaǵan úsh balasy bar eki múgedek balasy bolǵanyn, aýyr qylmystyq quqyq buzýshylyqty otbasylyq jáne basqa da jaǵdaılardyń saldarynan jasaǵanyn eskerdi. Sottalýshy Aqylbek Rysqalıevqa 7 jyl, Ómirtaı Adamovqa 4 jyl merzimge bas bostandyǵynan aıyrý jazasy taǵaıyndaldy», -dep habarlady sottyń baspasóz qyzmeti.

Sottalýshylardyń ekeýi de memlekettik qyzmette laýazymdardy atqarý quqyǵynan ómir boıyna aıyryldy. Sottalýshylar sot zalynan qamaýǵa alynǵan edi.