Jeti jasar qyz álemdegi eń jas opera ánshisi atandy
NUR-SULTAN. QazAqparat - AQSh-tyń jeti jasar turǵyny Vıktorııa Brınker álemdegi eń jas opera ánshisi atandy, - dep habarlaıdy QazAqparat UPI agenttigine silteme jasap.
Agenttiktiń málimetinshe, Brınker 2019 jyly Pıttsbýrg qoǵamdyq teatrynyń «Jaryqtar men ańyzdar» shoýynda segiz kásibı kóriniske qatysqannan keıin jeti jasynda rekord ornatqan.
«Men erte sóılep, eki jasymda án aıta bastadym. Eki-úsh jasymda tutas kompakt-dıskilerdiń sózin jattap aldym. Únemi án aıtatynmyn», - deıdi Brınker.
Ol operaǵa 6 jasqa tolar aldynda, anasy ony ónerdiń osy túrimen tanystyrǵan kezde qyzyqqan.
Brınker Gınnestiń rekordtar kitaby boıynsha ıtalıandyq teleshoý Lo Show Dei Record-qa shaqyryldy jáne shoý barysynda oǵan onyń jetistigin rastaıtyn sertıfıkat tabys etildi. Vıktorııanyń dıapazony qazirgi ýaqytta úsh oktava jáne ol jeti tilde serenadany oryndaı alady.
