Jeti túrli ilim biletin urpaq tárbıeleý búgingi kúnniń mindeti - Memleket basshysy
NUR-SULTAN. QazAqparat - Jeti túrli ilim biletin urpaq tárbıeleý búgingi kúnniń negizgi mindeti. Bul týraly búgin Tamyz konferentsııasynda Memleket basshysy Qasym-Jomart Toqaev aıtty, dep habarlaıdy QazAqparat tilshisi.
«Tarıhy tereń dástúr sabaqtastyǵy ulttyq tárbıe arqyly beriledi. Maǵjan Jumabaev »Pedagogıka« eńbeginde: »Árbir tárbıeshi balany ult dástúrimen tárbıeleýge mindetti« dedi. Ata-babalarymyz amanat etip ketken ulan-ǵaıyr dalany aman saqtaý eń aldymen jas býynǵa artylatyn zor mindet. Keıingi urpaq Táýelsizdigimizdiń týyn árqashan joǵary ustaýy tıis», - dep atap ótti Qazaqstan Prezıdenti.
Osy oraıda Memleket basshysy qazirgi jahandaný dáýirinde jańa tehnologııanyń qarqyndy damýy ómirimizge túbegeıli ózgerister ákeletindigine nazar aýdartty.
«Adam kapıtalyna, bilim salasyna qoıylatyn talaptar múldem ózgeshe. Sapaly bilim qarqyndy damýdyń basty shartyna aınaldy. Uly Abaı únemi synǵa alǵan masyldyq qoǵamǵa eshqashan jaqsylyq ákelgen emes. Sony túsinetin jastarymyz tek bilimmen qarýlanyp, eńbekke ǵana arqa súıeýi tıis», - dedi Q.Toqaev.
QR Prezıdenti qazirgi zamannyń jańasha talaptary men úrdisterine árqashan saı bolýymyz kerektigin basa aıtty.
«Bul úshin bir orynda turyp qalmaı, ilgeri jyljý basty maqsat bolý tıis. Sondyqtan bilimi tereń, oıy ozyq urpaq tárbıeleıtin muǵalimder qaýymyna zor jaýapkershilik júkteledi. Sizderdiń búgingi shákirtterińiz Qazaqstannyń jarqyn bolashaǵy. Sapaly bilim jetistikterge jetýdiń joly ári ekonomıkany damytýdyń basty quraly. Jeti túrli ilim biletin urpaq tárbıeleý búgingi kúnniń negizgi mindeti», - dedi Memleket basshysy.
